Цінны вітражы Новосільского выратуваны

Вынятковы вітражы, котры находят ся в варшавскым храмі Божого Провидіня в Весолій, вымагали пильной інтервенциі. Сут они частю проєкту середины авторства Юрия Новосільского. Артиста зреализувал проєкт в 70. роках ХХ столітя. Як раз закінчено консервацию вітражів.

Невеликій костел Божого Провидіня находит ся в центральній части варшавского дистрикту Весола. Выбудували го в другій части 30. років ХХ столітя в стили, што навязує до романьской архітектуры. Землю під святыню дарувал бывшый маітель тамтых теренів – князь Емануель Булгак. Він тіж сфінансувал будову.

Костел вознесли з цеглы. Был в суровым стані, коли выбухла война. В 50. роках доставили до него хор, ризницю і сходы до головного входу. А двадцет років пізнійше в храмі явила ся робота, котру принимают за єдну з ліпшых реализаций сакральной штукы в Польщы другой половины ХХ столітя. Товдышній парох, о. Стефан Высоцкій запросил до Весолой Юрия Новосільского, котрый выдумал внутрішній выгляд храму. Од 1975 до 1977 рока возникли утриманы з візантийскій конвенциі поліхроміі, декорациі повалы, підлога, вітражы, стациі Хрестной Пути та інчы елементы выпосажыня.

Артисті помагали молодый фільмовец Павел Ружевич, маляр Мілош Бенедиктович, студенты і місцева молодіж, в тым будучый консерватор памятників Павел Садлей. Вітражы, котры так само запроєктувал Новосільскій, зробила артистка Тереса Реклевска. Вітражы мают барз просту ґеометричну форму, а схоснувана кольористика то: синій, червеный, жолтый, помаранчевый та прозрачный. Выполнили 19 вікєн.

Новосільскій до Весолой вернул в 70. роках. Разом з Галином Оніхімюк і Павлом Садлейом прикрасили поліхромійом каплицю реколекцийного дому, котрый побудувано при костелі.

В 2004 році, зараз по влучыню Весолой до Варвашы, інтерєр храму і каплиці вписано до реґістру памятників. В 2019 році в реґістрі нашол ся цілый костел разом з цмонтерями (костельным і гребальным). В меджечасі ведіня парохіі переняла екуменічна спільнота Шемен Неф (Chemin Neuf).

Творам Новосільского поважні пошкодили нещестны ремонты костела, особливо вкрытя цегляных стін піноплястом. Тота герметична верства влинула на зміну вільготи і циркуляцию повітря во внутри храму. Поліхроміі частично завільготніли і одбарвили ся. Зачали одлітувати, явили ся зарисуваня.

Од 2021 рока в костелі ведены сут бадавчы, консерваторскы і реставраторскы роботы під контрольом Мазовєцкого Воєвідского Консерватора Памятників. В першій черзі зачали працувати над знищеном поліхромійом, пак заняли ся вітражами.

«Были в злым технічным стані, вымагали пильной консерваторской інтервенциі. Вшыткы были деформуваны, част шыбок потріскала. Причыном деформациі были предовшыткым выконавчы блуды, м.ін. за тонькы профілі з олова, неправильне кітуваня» – подає Бюро Столичного Консерватора Памятників.

Головном цілю консервациі было вернути одповідні технічны параметры вітражам. «Роботы были ведены в консерваторскій працовни. Треба было: выпростувати кватеры, обчыстити старый кіт, вмыти, зміцнити лютюваня, поклиіти тріснены шкла, закітувати» – вычыслят БСКП.

Першый етап ремонту вітражів прошол в 2024, другій – в 2025 році. Парохіі повело ся одремонтувати вшыткы вітражы (девятнадцет).

В текучым році парохія хоче заізолювати завільгочены муры притвора і ризниці. Будут забезпечати тіж поліхромію Новосільского в притворі.