Творы Варгола вынесуть на Кременець

Вісем выставных друків творів Енді Варгола вынесуть в пятніцю 5-го авґуста 2022-го року на Кременець, найвысшый верьх Полонин на словацько-польско-україньскім тригранічу.

Музей модерного уменя Енді Варгола в Меджілабірцях тым одштартує концепт експеріменталных перформатівных выстав з назвов 15 минут славы. Як про аґентуру TASR повів директор музея Мартін Цубяк, проєкт, котрого ідея выникла почас першой волны пандемії COVID-19, має ціль, жебы представити уменя мімо традічных выставных просторів, а так само споїти плановане з нагодным.

Вынесіня умелецькых творів до природы буде мати за словами Мартіна Цубяка історічну премєру.

Уменя ближе ку людям

„Віриме, же уменя, і тото высоке, бы мало популарізовати ся так, жебы было штонайближе ку людям. Нашов пріорітов є так само споїти плановане з нагодным, комуніковати о уменю на місцях, котрых першорядый характер не є приготовленый про умелецьку презентацію,“ повів Цубяк.

Ідея куртых выстав творів Енді Варгола на нетрадічных місцях, як пояснив, пришла почас першого локдавну, кедь не было уменя в інштітуціях про людей приступне. Наперед мало іти о 15-минутовы выставы іншпірованы высловом Варгола, же каждый раз буде мати своїх 15 минут славы.

Но выставы, з котрыма музей в пятніцю зачінать, будуть наконець довшы. Їх планованя є у выбері місця і образів, котры з ним будуть повязаны, елементом нагоды, котра была про творчость Варгола тіпічна, є незнама кількость людей, котры іншталованы творы увидять.

І зато авізо о планованій выставі, лем день перед реалізаційов, є заміром Музея модерного уменя Енді Варгола. Подля Цубяка хотять, жебы люди не ходили конкретно на тото місце, жебы видіти выставу, але жебы несподівати турістів, котры ся на місці находять.

Сімболічно Кременець

Выбер Кременця як місця першой екстерьєровой выставы є сімболічный. „Єднак то оточіня тіпічне про область, в котрій родічі Варгола жыли, а так само в актуалній сітуації войнового конфлікту на Україні є Кременець сімболічным місцьом, де ся стрічать світ Европской унії з тым україньскым,“ повів Цубяк.

Меджі далшыма задуманыма місцями є Микова, одкыль походили родічі Варгола, Сниньскый камінь, Долина смерти ці опущены будовы рольницькых дружстев. Із вшыткых выстав має так само выникнути відео, котре буде приближовати трасу, котра ся перешла, іншталацію творів, реакції людей, котры на выставах притрафлять ся ці розговоры з нима.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА