У Відню одбыла ся стріча восточных католицькыx єпіскопів Европы

Як інформовав за Пряшівску архієпархію Михал Павлишко, од 8-го до 11-го септембра 2025-го року в століці Австрії одбыла ся 26-та стріча єпіскопів восточных католицькых церьквей в Европі. На стрічі брало участь 65 єпіскопів, і понад 100 представителів восточных католицькых церьквей в Европі.

Традічно на стрічі брали участь і єпіскопи русиньской традіції, котра выходить із Ужгородьской унії.

250 років од основаня семінарії

Стріча одбыла ся у Відню на основі позваня кардінала Хрістофа Шенборна, якый є ордінарійом Ордінаріату про католиків візантійского обряду в Австрії, і то в рамках 250-ой річніці од основаня Ґрекокатолицькой семінарії Барбареум у Відню цісарьовнов Марійов Терезійов.

Меджі участныма быв і префект Дікастерії про восточны церькви – кардінал Клаудіо Ґуджеротті, апостольскый нунцій в Австрії Монс. Педро Ліпез Квінтана, і презідент Рады европскых єпіскопскых конференцій  Европы – архієпіскоп Ґінтарас Ґрушан.

Першый раз восточна літурґія в Домі святого Штефана

Тема тогорічной стрічі была Єдность в розмаїтости. Окрім робочіх засідань в рамках проґраму были і богослужіня в різных восточных обрядах.

Унікатным было тот рік тото, же в середу 10-го септембра была одслужена архієрейска літурґія в Домі святого Штефана, і было то першый раз в історії, што в тім храмі служыла ся візантійска літіурґія.

Літурґія „была высылана в прямім ефірі австрійсков публічнов телевізійов, і стрітила ся із барз позітівныма реакціями в шырокых кругах,“ інформовав Павлишко.

Важныма пунктами проґраму были і стрічі з представителями публічного жывота, як наприклад з пріматором Відня Михаелом Лудвіґом, або з федералнов міністерков Клаудійов Плаколм. „Будованя взаємного решпекту і солідарности, слуханя потреб окремых церьковных комуніт, головно тых, котры суть засягнуты войнов, ці встановліня найважнішых задач восточных католицькых церьквей в сучасности – то вшытко было предметом полодных діскусій і взаємного діліня ся.“

По стрічі засідала Рада єрархів

По стрічі у Відню в пятніцю 12-го септембра одбыло ся на Єпархіалнім уряді в Братіславі 40-те пленарне засіданя Рады єрархів Ґрекокатолицькой церькви на Словакії.

На зісіданю брали участь Высокопреосвященый Йона Максим, пряшівскый архієпіскоп і митрополіта, Высокопреосвященый архієпіскоп Кіріл Василь, кошыцькый єпарха, Преосвященый владыка Петро Руснак, братіславскый єпарха, і помічный єпіскоп Братіславской єпархії кір Мілан Лах. Особно пришов єпіскопів поздоровити і апостольскый нунцій на Словакії – архієпіскоп Нікола Джірасолі.

Засіданя одбыло ся на Єпархіалнім уряді на позваня братіславского єпархы – владыкы Петра. Вечур перед засіданьом єпіскопи в Катедралнім соборі Воздвиженія Честного Креста одслужыли літурґію, на кінцю котрой заґратуловали владыкови Петрови ку його недавным 75-ым народенинам, і подаровали му нову митру.