У Виноградові одбыла ся презентація новой книжкы і образів Александра Купаря

У чіталній салі Виноградівской публічной бібліотекы 23-го апріля 2021-го року одбыла ся презентація книжкы Новелы, юморескы сучасного русиньского писателя Підкарпатя Александра Купаря (псевд. Александер Хуст).

Почас презентації было так само представленых 15 образів умелця, на котрых суть зображены прекрасны пейзажы Підкарпатя.

Річніця народжіня Духновіча

Дана акція ся реалізовала в рамках події святкованя 218-ой річніці од дня народжіня русиньского будителя Александра Духновіча. Орґанізатором і модератором презентації быв Юрій Продан – голова Закарпатьского областного научно-културолоґічного общества імени Александра Духновіча.

Непозераючі на карантенны обмеджіня в реґіоні, і обмеджену кількость гостів, у чіталній салі ся зобрали істинны поклонници творчости Александра Купаря, і колеґове по писаню.

Публіка сердечно і радо заґратуловала авторови ку выданю його новой книжкы. Антон Галас започав акцію свойов авторьсков пісньов Мала Копаня, а Марія Білак і Василь Січ заспівали звязку русиньскых співанок. А коли дали слово голові Районного научно-културолоґічного общества імени Александра Духновіча, народному поетови Підкарпатя – Михайлови Чухранови, то він підчеркнув особенну лаконічность русиньского языка у творах автора.

З поздоровныма словами выступив зачінаючій поет Віктор Черкун, член Народной Рады Русинів Закарпатя і поет Іван Бинячовскый, а так само педаґоґ на пензії Магдалина Дідіч, староста села Мала Копаня Ганна Фурик, і директорка Виноградівской публічной бібліотекы Катерина Вашкеба.

На завершіня автор продекламовав свою любиму гумореску Но, вто чудный із нового зборника Новелы, юморескы.

Нова книжка прозы

Кедь говорити о самій книжці Новелы, юморескы, то она має дві части: 8 новел публікованых до року 2015, котры были в книжці Александер Хуст: Новелы, і 8 новел а 6 гуморесок публікованых у русиньскых журналах Русинськый світ, Отцюзнина і в Альманасі днишньої русинської літературы по 2015-ім році.

У своїх творах прозаік Александер Купарь сператься на властны складны жывотны скушености, і з іронійов, сарказмом і сатіров майстровскы вказує многосторонность і контрастность людьского бытя.

Як бы розпорно не звучало, але новелы наповнены гуманістічныма і позітівныма ідеями. Писатель – реаліста, піднимать у своїх творах окрем класічных і найактуалнішы модерны проблематікы днешнього поколіня, такы як веґетаріанство, контрабандізм, і другы.

В планах писателя выдати по русиньскы шпеціалізовану літературу, де ся буде описовати значіня стародавных деревяных храмів родного краю, а в сучасности занимать ся писаньом романів о долі Русинів штирьох поколінь.

Іщі бівше о Александрови Купарьови і його новій книжці Новелы, юморескы можете ся дізнати в новім выданю проґраму «Голосы Русинів Підкарпатя» вже тоту середу (12-го мая 2021 р.).

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА