Увага на змыі

Кінцьом квітня/апріля і початком мая в лісах полудньово-східньой Польщы, головні в Низкым Бескіді і Бєщадах, частійше як нормальні, мож видіти змыі. То зато, што в тым часі лучат ся в пары і рыхтуют до розроду. Добрі о тым памятати в контексті надходячого долгого вікенду і отвореного входу до лісів і парків.

Змыі то єдины ідовиты рептилиі, што жыют в Польщы, і хоцкі самы забивают барз мало люди, то часом сут жертвами. Люде вбивают іх, бо ся іх боят. Еколоґы апелюют, што змыі то хосенны звірята і мают барз важну функцию в середовиску. Полюют на малы звірята, як мышы, котры сут деяком загорозом для засіву. Протягом сезону єдна змыя знат уполювати аж і 25 дорослых мышы.

В часі прогульок до ліса треба взувати порядны, высокы черевікы, котры ґенеральні забезпечат перед вкушыньом. Стріча з рептилийом є можлива, зато товды треба быти барз осторожным. Там, де змыі выступуют чысленнійше, лісникы ознакували тзв. змыйовиска. Улюбленым середовиском змый сут полянкы, лукы, мокры лісы, камениска. Місцьом розроду можут быти і придомашні скалисты загорідкы. Ямы медже каменями то для них ідеальне схороніня.

Треба міцно тупкати, жебы одстрашыти змыю

Змыя потенцияльну жертву оцінят під оглядом своіх покармовых можливости, зато николи не вкусит чловека, коли тот не даст ґу тому причыны. Переважні одрухово атакує, коли не ма можливости втечы. Вкушыня змыі не болит. Остают по ним два невеликы сліды од зубів. Біль і заморочыня зачынают ся по 15-20 минутах. Ід діє головні на нервовый систем.

Дорослый здоровый чловек повинен пережыти вкушыня змыі без більшых комплікаций. Вкушыня дітины може быти реальном загорозом, бо токсичніст іду єст одворотні пропорцийональна до вагы тіла жертвы. Небезпечный є тіж ід змыі для особы, яка єст під влияньом алькоголю. Зараз по вкушыню треба подати антитоксину.

В полудньово-східній Польщы популярны сут три одміны змый: бронзовы, срібристы і чорны. Спільном розпознавальном приметом єст знак «х» на голові і зиґзак на хырбеті. Змыю мож одстрашыти, як ся буде міцно тупкало.