Уж неодолга два концерты Сусанны!

В найблизшым часі, артистка добрі знана чытачам порталю лем.фм – Сусанна, одбуде два концерты в двох ріжных державах.

Перший з концертів, в камеральным складі – бо в товаришыню єдного акомпаніятора – піяністы Павла Гараньчыка, заспіват 24. квітня т.р. в Украіні в місті Ужгород. Буде то запертий концерт на запрошыня Товариства Польской Культуры Закарпатя ім. Гнєвы Волосєвіч з нагоды 20-літя того же Товариства. В часі подіі одбуде ся тіж презентация його доробку. Участ возмут Консуль Польской Республикы во Львові, представникы нацийональных і етнічных меншын та партнеры з Польщы – саноцкій одділ ОУП (Объєднаня Украінців в Польщы), якій репрезентувати буде Мариянна Яра.

Концерт буде мал назву Низко сонечко – пісні душы (Nisko słonko – pieśni duszy), од польской народной співанкы, бо заходяче сонце, то маґічний видок і час. Преважні вечером, або і вночы, нашы думкы зосереджают ся довкола подій дня, але тіж і жытя. Минулого, теперішнього та будучого. Споминаме, аналізуєме, цнеме. Роздумуєме, што зробили сме злі, а што пішло добрі. Любиме тіж мрияти… – так о музычній оповісти, яка жде на слухачів в Ужгороді, бесідує артистка.

З другым концертом, уж в більшым складі, Сусанна выступит в леґендарным для краківской богемы місци – Пивници під Баранами (Piwnica pod Baranami). Концерт В шестьох кольорах буде проходил 29. квітня од 19.00 год. Сусанні товаришыти будут Павел Гараньчык – клявішовы інструменты, Мацєй Вульв – гушлі та Мілош Сквірут – контрабас.

Велику част концертового репертуару В шестьох колорях занимают співанкы Петра Мурянкы. Добром вістю для вшыткых любителів творчости Мурянкы, як і артизму выконаня Сусанны, єст тото, же неодолга (а напевно в 2015 році) вкаже ся платня з репертуаром В шестьох колорах. Буде то друга, по дебютантскым кружку Весна, весною, печатаным в 2013 році, сольова платня Сусанны.

Сусанна співат од найменьшых років жытя, была членом десяток ансамблів, хорів ци музычных ініциятыв, взяла тіж участ в проєкті Пісні і сьпіванкы Петра Мурянкы. Єдным з ефектів той спілпрацы было награня разом з аснамбльом КвадроСусанна відеокліпу до пісні Посій же, ся посій, до поозбераня і послуханя пониже.

Дебютантску плятню Сусанны Весна, весною та платню Пісні і сьпіванкы Петра Мурянкы, на котрій тіж співат Сусанна, можете сой придбати через наш порталь за тым мотузком.