IV Ґорлицкы Гірскы Бігы в Низкым Бескіді
18. листопада/новембра 2018 р. прошли IV Ґорлицкы Гірскы Бігы в Низкым Бескіді. Дальший то уж раз і певно не послідній, коли глубоком осіню проходит тота акция.
На пути долгости 22,5 км змагало ся близко 400 осіб, так аматорів, як і професийоналистів. Траса змагань вела самым серцьом Низкого Бескіду і Лемковины. Зачынала ся в Высовій, ішла Бліхнарком на Высівскій Перевал. Пак, беручы участ в змаганях ішли вздолж польско-словацкой границі, а дальше скручали до Реґєтова Выжнього. На остатніх кілометрах трасы змагаючы ся підходили на Ротунду, на якій находит ся воєнний цмонтір з І світовой войны, а пак ждал іх найбарже інтенсивний фраґмент трасы – выхід на Кізє Ребро, де на трасі 1 км мусіли перейти 300 м ріжниці высокости медже двома пунктами.
Хвиля того рока была барже зимова як осіння. Рано температура впала до -5 градусів і цілий пут змагаючы ся мусіли перейти при невеликым морозі. Охочых брати участ в акциі было вынятково вельох. Уж на парунадцет дни перед змаганями ліміт записів был осягнений.
Орґанізаторами подіі были Роверовий Склеп Остре Колесо в Ґорлицях, Біциґльовий Клюб Ґрупетто і Осередок Родинного Выпочынку «Затише» в Высовій. Желаме орґанізаторам, жебы і о рік Ґорлицкы Гірскы Бігы стрітили ся з так великым заінтересуваньом, як не більшым, охочых з цілой Польщы. Знимкы ідут зо страны www.bieggorski.pl, де можна і найти більше інформаций о акциі.
Фот. Наталия Подсадовска і Яцек Спыра
