В Братіславі інтронізовали владыку Мілана Лаха

В суботу 21-го марца Ґрекокатолицькый катедралный собор Воздвиженія Честного і Жывотворящого Креста в Братіславі быв місцьом інтронізації історічного другого правлячого єпіскопа Братіславской єпархії – Преосвященого владыкы Мілана Лаха.

Торжество, котре проходило на Акафістову суботу, было за участи апостольского нунція на Словакії Ніколы Джірасолі, пряшівского архієпіскопа і митрополіты – Высокопреосвященого владыкы Йоны Максима, кошыцького єпархы – Высокопреосвященого владыкы Кіріла Василя, і емерітного братіславского єпархы – Преосвяченого владыкы Петра Руснака.

Гості із Словакії і зо світа

Меджі участныма быв і емерітный кошыцькый єпарха владыка Мілан Хаутур, єпіскопи мукачовской русиньской традіції – мукачовскый єпарха Теодор Мацапула, ніредьгазьскый єпарха Авел Сочка ці руськокерестурьскый єпарха Ґеорґій Дуджар. Участь брав і єпіскоп із Румунії.

Участь взяли так само словацькы римокатолицькы єпіскопи на чолі із председом Конференції єпіскопів Словакії – кошыцькым архієпіскопом митрополітом Бернардом Бобером. Із заграніча на інтронізацію пришли віденьскый римокатолицькый кардінал Хрістоф Шынборн, римокатолицькый єпіскоп Ларрі Джеймс Кулік із США ці оломовцьскый римокатолицькый архієпіскоп Йозеф Нузік.

Участных было і дакілько єпіскопів Україньской ґрекокатолицькой церькви, котры передали новому братіславскому єпархови поздоровліня од головы той церьковной штруктуры – верьховного архієпіскопа Святослава Шевчука.

Не бракло ани представителів іншых хрістіанськых церьквей на чолі із ґенералным єпіскопом Євангелицькой церькви авґсбурзьского віроісповіданя і председом Екуменічной рады церьквей Іваном Ельком. На торжестві участь взяв і посол Словацькой републікы при Святішім Престолі Юрай Пріпутен.

Інтронізовав митрополіта

Торжественну архієрейску літурґію як головный служытель вів Высокопреосвященый Йона, пряшівскый архієпіскоп і митрополіта, котрый мав і проповідь.

Обряд інтронізації наслідовав по прочітаню євангелія. Двоми єпіскопи – владыка Кіріл, кошыцькый єпарха, і владыка Петро, емерітный братіславскый єпарха, привели нового братіславского єпарху Мілана перед митрополіту Йону, котрый пожадав апостольского нунція Ніколу Джірасолі, жебы прочітав булу, котров Папа Римскый Лев XIV. призначів 6-го марца того року нового правлячого єпіскопа про Братіславу.

По прочітаню і потверджіню вольбы радностным співом народа „Аксіос!“, наслідовав акт усаджіня нового єпархы на єпіскопскый столець. Владыку Мілана допроводили єпіскопи Кіріл Василь і Петро Руснак. Ключовым моментом было переданя єпіскопского жезла з рук митрополіты Йоны.

По закінчіню літурґії приговорило ся веце єпіскопів, за Братіславску єпархію приговорив ся протосінкел єпархії – митрофорный протоєрей Владимір Скиба. На кінцю слово собі взяв і новый єпарха – владыка Мілан, котрый ся звірив під покровителів єпархії і блаженых нашых мучеників із надійов, же його діяня в столиці Словакії поможе ку далшому розквіту ґрекокатолицькой громады.

Фотоґрафії: TK KBS.