В Коцурі змагали ся з русиньского языка

Як інформує аґентура Рутенпрес, в просторах Основной школы Братство єдинство в Коцурі (Сербія) в суботу 1-го апріля 2023-го року одбыло ся 13-те Меджіокружне змаганя з русиньского языка і языковой културы.

Подія одбыла ся в рамках 260-ой річніці насельованя Русинів до Коцура, 110-ой річніці першого театралного представліня в Коцурі, і 110-ой річніці од народжіня проф. Гавриїла Г. Надя.

На змаганю брали участь школярі основных школ од пятой по восьму класу, де є русиньскый язык навчалным языком або де є русиньскый язык выберовый предмет з елементами народной културы.

Свої знаня вказало 51 школярів, котры пришли з Руського Керестура, Коцура, Дюрдьова, Бачской Тополі, Нового Орахова, Нового Саду, Сримской Каменіці, Петроварадина, Вербасу, Кулы, Бачінців-Шиду і Шиду. Як конштатує аґентура Рутенпрес, змаганя было успішне, о чім свідчіть факт, же із 51 школярів аж 35 скінчіло на першых трьох місцях.

На цілорепублікове змаганя, котре про школярів семой і восьмой класы одбуде ся 27-го мая так само в Коцурі, поступило 22 школярів, котры мають навчалный язык русиньскый, і 15 школярів, котры русиньскый язык учать ся як выберовый предмет.

При удільованю нагород успішным участникам была участна і предсидателька Одділіня про освіту Націоналного совіту Русинів Олена Папуґа. Змаганя орґанізовало Міністерство освіты, наукы і технолоґічного розвитку Републікы Сербії, Дружство про русиньскый язык і літературу а Основна школа Братство єдинство в Коцурі.

Жрідло фотоґрафії: Рутенпрес.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА