В Меджілабірцях реконштруовали Карпатьскый фронт

В суботу 21-го апріля 2018-го року проходив у Меджілабірцях вже осмый річник воєньско-історічной події під назвов Карпаты 1914/1915. Клубы воєнськой історії зо Словакії і споза граніць приближыли людям дії І. світовой войны. Подію приготовив Клуб воєньской історії Бескиды з Гуменного.

Як інформовала словацька державна пресова аґентура TASR, в проґрамі представило ся приблизно 300 выступаучіх.

„В тім році припоминаме собі сто років од кінця І. світовой войны. Із той нагоды сьме приготовили вже осмый річник події Карпаты 1914/1915. В рамках події до Меджілаборець пришли вказати ся клубы воєньской історії нелем зо Словакії, а і з іншых держав. Спомяну наприклад Чеську републіку, Мадярьско, Польщу, Україну, Австрію, Російску федерацію. Сценарь быв зробленый на основі історічных жрідел. Намагали сьме ся в годиновій реконштрукції вказати дії, котры проходили омного довше,“ повів про аґентуру Мартін Дробняк, председа Клубу воєньской історії Бескиды.

Участны могли в боях видіти нелем вояків, а і добову техніку. Любителі воєньской історії в Меджілабірцях вказали польный канон німецькой армії, добовы біціґлі ці летадло, котре підтримовало атаку російской піхоты.

Як інформовав Радослав Турік, підпредседа клубу, тот річник події быв кількостьов участных і богатостьов проґраму найвекшый. Підкреслив, же реконштруцкії боїв, котры мож было в суботу видіти, не были реконштрукційов конкретной історічной дії, але захопліньом різных дій, котры проходили на фронті од новембра 1914-го року до мая 1915-го року.

Навщівници могли в суботу посмотрити собі і выступліня воєньской дыховой музикы, мужской співацькой ґрупы з темов воєньскых і реґрутьскых співанок, презентацію выстроя і вызброя втогдышніх вояків і много далшого.

Подія Карпаты 1914/1915 была частьов проєкту під назвов Польско-словацьке подорожіня в часі, якый быв фінанцованый із Проґраму черезгранічной співпраці Іnterreg V-A Польща – Словакія 2014 – 2020. Співорґанізатором суботняйшой події было місто Меджілабірці.

Жрідло фотоґрафії: TASR.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА