В Новім Саді рихтують сімпозій о Діонізійови Нярадійови

Як інформує аґентура Рутенпрес, 5-го авґуста 2024-го року одбыла ся в Новім Саді, в просторах Заводу про културу войводиньскых Русинів, перша стріча Єпархіалного комітету про святкованя 150-ой річніці од народжіня ґрекокатолицького єпіскопа Діонізія Нярадія.

На стрічі обговорив ся план пририхтованя Меджінародного наукового сімпозія „Владыка Діонізій Няраді: жывот і діло“, як і далшых подій, котры суть повязаны з тым юбілейом.

Планованый сімпозій бы мав проходити в другій половині новембра того року в Руськім Керестурі і Новім Саді з тым, же буде орґанізованый Єпархійов святого Николая у співпраці із Ужгородьсков націоналной універзітов і Заводом про културу войводиньскых Русинів. О точній даті будуть орґанізаторы іщі інформовати.

Владыка Діонізій Няраді народив ся 10-го октобра 1874-го року в Руськім Керестурі, предкы походили із днешньой выходной Словакії. Богословскы штудії абсолвовав у Загребі, закінчів їх докторатом і у 1899-ім році там быв рукоположеный на священика.

На єпіскопа рукоположыв го архієпіскоп Лазар Младенов у 1915-ім році в Римі. Аж до 1920-го року быв апостольскым адміністратором Крижевацькой єпархії, пак став єпархіалным єпіскопом.

Його єпіскопске діяня є скапчане і з Карпатьсков Русьов. У 1922-ім році Святішый Престол призначів владыку Діонізія за апостольского адміністратора Пряшівской єпархії. В тім самім часі вів паралелно і свою Крижевацьку єпархію, а то аж до 1927-го року, коли Пряшівска єпархія дістала нового адміністратора, пізніше єпарху – Павла Петра Ґойдіча.

В роках 1938 аж 1939, штири місяці, быв іщі апостольскым адміністратором в Хусті. То быв резултат окупації части Підкарпатьской Руси Мадярьском по Віденьскій арбітражи. Дале існовала Мукачовска єпархія під веджіньом владыкы Александра Стойкы, то была менша часть під мадярьсков окупаційов, і решта єпархії на Підкарпатьскій Руси была дана до адміністрації Нярадія. Владыка вмер 14-го апріля 1940-го року.