В Новоселиці оправили знаму хыжку. Буде в ній музей телевізных приповідок

Народный дім в Новоселиці в окресі Снина, котрый люди на Словакії знають як хыжку Дідка Вечернічка, знова вызерать так, як го знать телевізна публіка вечернічків – вечорных телевізных приповідок.

Кедьже іде о народну културну памятку, на обновліня хыжы, котре ся реалізовало традічныма матеріалами і робочіма поступами, дозерали робітниці памяткового уряду. Як інформовала аґентура TASR, будова бы мала подля директора штудія RTVS Кошыці, Йозефа Пухалы, служыти як експозіції вечернічків.

Унікатна хыжа

„Важным было, же ся нам подарило заховати унікатность того обєкту в подобі соломяного покрытя,“ повів про аґентуру Антон Лишка з Крайского памяткового уряду Пряшів з тым, же будова з перелому 19-го і 20-го столітя є шпеціфічна якраз вдяка соломяній стрісі.

„То послідній обєкт свого тіпу, котрый є на теріторії Пряшівского самосправного краю із соломянов стріхов і є мімо сканзену,“ пояснив Лишка.

Притім робота на захованю автентічной подобы стріхы была подля Душана Жіпая, котрый робив реконштрукцію, найкомплікованіша. „І позганяти то была проблема, і з роботов є то часово складне,“ повів з тым, же ціла обнова хыжкы тырвала його ґрупі 4 і пів місяця.

В рамках тых робот дали долов стріху, вшыткы ваковкы, і кедьже было треба дати хыжу на новый фундуш з причіны маєтковых прав, обєкт цілый розобрали, очісловали компоненты і поскладали на новім місці. Пак ся наново давала нова стріха, ваковало ся. Вымінили ся і такы компоненты хыжы, котры ся вже не дали оправити, наприклад скло на облаках.

Як оцінив сітуацію коло хыжкы Йозеф Пухала, роботы іщі не суть закінчены. За його словами треба докінчіти інтерьєр і екстерьєр коло будинку.

Хотять турістічну атракцію

Верейноправный Розглас і телевізія Словакії – RTVS, є теперь властником споминаной хыжкы і фундушу під ньов. Пухала про аґентуру повів, же бы привітали, кебы ся з хыжкы Дідка Вечернічка стала выглядавна турістічна атракція.

„Рахую з тым, же там буде експозіція, котра навщівникам приближыть вечернічкы Чехословацькой телевізії, Словацькой телевізії і Розгласу і телевізії Словакії, жебы діти, але і іншы інштітуції, котры ту прийдуть, або лем так інтересуючі ся навщівници, начерьпали нелем інтересны, але і забавны інформації, жебы ся многы могли вернути до спомин, так, як то колиська в телевізії было, а іщі і частночно є высылане,“ повів Йозеф Пухала.

Народный дім в Новоселиці став частьов памяткового фонду Словацькой републікы в 1987-ім році. Про недорішены маєтковы права му грозило, же впаде. О сохраніня цінной хыжкы постарав ся староста Новоселиці Василь Дініч, котрому ся подарило властницьтво розрішыти в році 2018. Кінцьом 2018-го року будову одкупив RTVS. Обновили єй і вдяка дотації з Міністерства културы Словацькой републікы.

Жрідло фотоґрафії: Prešovský samosprávny kraj.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА