В октобрі буде Русин філм фест

Реґіоналнa орґанізація Руськой маткы за Срим і Шіду в рамках актівностей Світового конґреса Русинів і Руськой маткы в днях 1-го і 2-го октобра 2016 орґанізує Первый міджінародный мултіжанровый русиньскый філмовый фестівал „Русин філм фест“. Інформує о тім інформачна аґентура Рутенпрес.

Першый річник нового фестівалі буде присвяченый страданю Русинів в часах І. світовой войны, окремо в лаґрі в Талергофі в Австрії. Як раз о Талергофі буде промітати ся і філм російского документарісту Алексея Денісова, котрый має быти участный і на фестівалі, під назвов Треґедія Галицькой Руси. Вєдно з Денісовом приобіцяли участь на фестівалі і представителі російской амбасады в Белеграді, членове Світовой рады Русинів, представителі Комісії про културу Світового конґреса Русинів і представителі русиньской орґанізації в Москві.

На фестівалі мають брати участь і представителі містной войводиньской автономії, з котрыма ся делеґація Руськой маткы в тых днях стрітила. За Руську матку были на стрічі участны Дюра Папуґа, Миломір Шайтош, Саня Тіркайло і Владо Джуджар. За автономію были на стрічі участны Мірослав Штаткіш, секретарь про културу, і його заступник Небойша Кузмановіч. Інформовала далше аґентура Рутенпрес.

Руська матка (Руска матка) є добровольным обчаньскым здружіньом, котре пропаґує і підтримує културный жывот і розвиток войводиньскых Русинів. Наперед была заснована у 1945 році і в тім часі намагала ся фінанчно підтримовати бідных штудентів, выдавала популарно-освітні публікації і обще пропаґовала Русинів і їх войводиньску варіанту русиньского языка. Головный центер „Руской маткы“ быв у Руськім Керестурі, де орґанізація мала і свою друкарню. Окрім того мала 12 містных орґанізацій в містечках Войводины і Сриму. Орґанізація перестала існовати у 1948 році. Діяльность была заказана, як і іншым русиньскым орґанізаціям в іншых комуністічных державах в тім часі, режімом, кідьже „Руска матка“ не прияла україньску орьєнтацію.

Орґанізація обновила ся у 1990 році в Руськім Керестурі. Їй формалне обновліня было при нагоді 250-го юбілею переселеня Русинів до Войводины, на теріторії днешньой Сербії і Хорватії. „Руска матка“ є єднов із основаючіх членів Світового конґреса Русинів і членом „Maison des Pays” – орґанізації бездержавных народів.

Фотоґрафія: www.ruskeslovo.com

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА