В Перечині одкрыли памятну таблу основательови Сокола

28-го октобра 2025-го року, в день 107-ой річніці выникнутя 1-ой Чехословацькой републікы, до котрой приєднала ся і теріторія Русинів, включно Підкарпатьской Руси, в комплексі Туряньска долина в Перечині одкрыли памятну таблу Мірославови Тіршови.

Інформовав о тім Володимір Чубірко – політік, бывшый голова Закарпатьской областной рады. Табла є ініціатівов Клубу Томаша Ґаріка Масарика в Ужгороді, котрый старать ся о захованя історії Чехословацькой републікы на Підкарпатю, і веде го Іван Латко.

Мірослав Тірш у 1862-ім році в Празі основав тіловыховну орґанізацію Сокол. Основныма ідеями Сокола были фізічны способности, демокрація, патріотізм, соціална справедливость і братьска дружба.

По выникнутю Чехословакії орґанізація дістала назву Чехословацька громада сокольска, і пошырила ся як на теріторію Словакії, так і Підкарпатьскій Руси. Соколы іщі почас Першой світовой войны вступовали до чехословацькых леґій, од октобра 1918-го року озброєны одділы Сокола перевзяли порядковы функції по розпаднутій австрійскій поліції, функціонарі і членове творили основный кадер нового чехословацького войска.

І першый Чехословацькый презідент Томаш Ґарік Масарик быв актівным членом Сокола. В часі першой републікы Сокол став єдным із ґарантів демократічной чехословацькой державности, політічнов опоров їй основательской ґенерації, і політікы Пражского граду. Ку кінцю першой републікы мала Чехословацька громада сокольска коло 50 000 членів.

28-го октобра 1932-го року Мірославови Тіршови в Ужгороді торжественно одкрыли бусту. Была на Набережній. Памятник быв одстороненый почас окупації Підкарпатьской Руси гортійовскым Мадярьском.