В Пряшові мож видіти выставку о выселенецьтві Словаків і Русинів

Крайскый музей в Пряшові і Касіґарда – Музей выселенецьтва з теріторії Словакії до Северной Америкы приготовили у співпраці з Пряшівсков універзітов в Пряшові выставку о выселенецьтві Словаків і Русинів. Вернісаж одбыла ся в понедільок 12-го юла 2021-го року.

Подля автора експозіції з назвов Америцькый сон – Выселенецьтво із Словакії до Северной америкы, выставка вказує унікатный погляд на майже забыту капітолу історії. Навщівници можуть тіышыти ся на множество унікатных автентічных артефактів, інформує музей.

Обовязок односно предків

Область северовыходного Угорьска, значіть реґіоны бывшого Шарішского, Земпліньского ці Ужаньского комітату (жупы) были великым выселіньом, не раз і цілых родин, постижены найвеце. Наперек тому, же од остатньой четвертины 19-го столітя до 1968-го року еміґровали статісячі людей, є тот феномен подля Мартіна Явора, автора выставкы, в сучастности майже цалком іґнорованый.

За словами Явора має на тім найвекшу заслугу штиридцятьрічна абсурдна надвлада комунізму, про котру была еміґрація до „капіталістічного заграніча“ червенов темов, о котрій не сміло писати ся. І зато му тота тема стала близков, і має намагу тоту проблематіку пропаґовати.

„То якыйсь обовязок односно нашых предків, котры не раз страстиповну путь меджі родным крайом і Америков абсолвовали вецераз,“ бісідує Явор.

Присмак американьства

Выставка подля директора Крайского музея в Пряшові дає навщівникам можливость спознати штоденну реаліту жывота словацького ці русиньского выселенця.

„Навщівник може окоштовати присмак американьства в подобі унікатных предметів штоденной потребы, ці тяжкых або святочных моментів, котрых пережывали нашы краяны за океаном,“ приближує атмосферу експозіції директор Любош Олейнік.

Выставку Америцькый сон – выселенецьтво із Словакії до Северной Америкы буде мож в Палаці Ракоція, котрого просторы служать музею, видіти до 31-го октобра того року.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА