В Пряшові одбыв ся 33-ій фестівал духовных пісень

Почас вікенду 14-го аж 16-го юна 2024-го року в пряшівскім Ґрекокатолицькім катедралнім соборі святого Йоана Крестителя одбыв ся 33-ій річник Фестівалу духовных пісень візантійского обряду.

Як про Інформачный центер Пряшівской архієпархії інформовала Валерія Грицьова, покровительство над фестівалом, котрый орґанізовав ся в рамках Року хрістіаньской културы, перевзяв Высокопреосвященый Йона Максим, пряшівскый архієпіскоп і митрополіта.

Фестівал быв одкрытый в пятніцю архієрейсков літурґійов, почас котрой співав Ґрекокатолицькый хор Стаурос із парохії Пряшів-Секчов.

Припомянули собі і Юрія Цімбору

Головный проґрам – фестіваловый концерт, проходив у суботу. Як першый выступив домашній Катедралный хор святого Йоана Крестителя. Тот своїм репертоаром припомянув 105-ту річніцю народжіня русиньского композітора і хормайстра Юрія Цімборы.

Далше выступали Хор святых седмочісленників із Собранець, Хор святого Йосифа при Базиліці Святого Духа з Михаловець, і уж споминаный Стаурос. По нім премєрово на фестівалі представив сю Ґрекокатолицькый хор при Храмі святых Кіріла і Мефодія з Тренчіна, котрый выникнув лем перед двома роками і быв „наймолодшым“ выступаючім хором.

Далше представив ся Хор Арханґелікос при Ґрекокатолицькім храмі святых апостолів Петра і Павла в Попраді, котрый пише довшу історію, но на тім фестівалі так само представив ся першый раз.

По нім выступили два хоры, котры красу візантійского літурґічного співу репрезентують довгы рокы і в загранічу, а то Ґрекокатолицькый храмовый хор блаженого Павла Петра Ґойдіча із Воронова над Топльов, і Хор святых Кіріла і Мефодія при Катедралнім соборі Рождества Пресвятой Богородіці в Кошыцях.

Братіслава мала на фестівалі участны обидва свої катедралны хоры – Хрісостомос і Кіріллометодеон. Сполочный репертоар приготовили Священьскый хор святого Йоана Дамаскина, якый творять бывшы членове Хору святого Романа Сладкопівця, і сучасны членове „сладкопівців“ – богословы Священьской семінарії блаженого єпіскопа Павла Петра Ґойдіча в Пряшові.

На кінцю заспівали вєдно Бортняньского

На кінцю концерту зазвучало Буди імя Господне од Дмитрия Бортнянського. Тоту літурґічну часть заспівали вєдно членове вшыткых хорів, котры на фестівалі брали участь.

В неділю фестівал продовжовав співом хорів при святых літурґіях. В Катедралнім соборі святого Йоана Крестителя співали братіславскы хоры Хрісостомос і Кіріллометодеон. В Храмі Воздвиженія Честного Креста в Пряшові-Секчові співав Ґрекокатолицькый хор Глагол із парохії Пряшів-Сідлиско ІІІ.

Фото: Блажей Ребяк.