В пяту річницю смерти Богдана Ґамбаля – запрoшыня на стрічу

Днес, 2. липця/юлия, минят докладні пят років, одколи бурсяне жытя замерло – по короткій хвороті одышол бл. п. Богдан Ґамбаль. Не были сме товды готовы на факт, же дале, дорогом – котру нам вызначал, будеме мусіти іти самы, без його підповіди, без його «шаленых» думок. Просто без него.

В пят років по смерти Богдана Ґамбаля – єдной з найбарже характерных фіґур соспільного жытя Лемків в послідніх десятках років – запрашаме до спільного упамятніня його особы і доробку. Стріча має быти нагодом не лем до припомніня його біоґрафіі, нашых споминів, але тіж до рефлексиі над сучасным розумліньом лемківской достоменности, котрой будуваню посвятил значучу част жытя.

Богдан Ґамбаль вродил ся 26. лютого/фебруара 1965 рока в Польковицях на Нижнім Шлеску, в родині выселенців з Чарной і Одырного. Лемковині і нашым справам оддал своє серце і заанґажуваня, але то на «проклятым заході», як мал во звыку – ни то в жартах, ни на поважні – бесідувати, был похороненый пару днів по смерти, в липци/юлию 2020 рока. Рішыньом Загального Згромаджыня Стоварышыня «Руска Бурса» в Ґорлицях з 2021 рока будинок достал мено Богдана Ґамбаля і так отримал він своє тырвале місце в улюбленых горах.

Был єдным з тых, котры в 1991 році реактивували Руску Бурсу і дали єй другє жытя. Роками был ведучым заряду Бурсы – інституциі выняткового значыня для культуры і едукациі. Руска Бурса была головным простором діяльности Богдана, а заєдно особливо близкым му місцьом.

В лемківскы справы зачал ся анґажувати уж за студентскых часів в Кракові. Спілорґанізувал стрічы, будувал реляциі, на діяня переносил возродны думкы.

Был серед членів основателів Стоваришыня Лемків – орґанізациі, котра як перша по 1989 році піднимала діалоґ з державныма властями і старала ся вырпацувати тырвалы рамы фунґуваня лемківской меншыны в Польщы.

Богдан Ґамбаль был вымагаючым і безкомпромісовым лідером – выкликувал емоциі і горячы диспуты, аж і звады. Знал анализувати неуспіхы, вытігати одповідні высновкы. Был прихыльником будуваня свідомой лемківской достоменности выходячой за рамкы фольклору і символичных споминів минулого.

Дал початок ЛЕМ.фм, котре грат цілу добу, а порталь фурт і фурт приносит новы вісти з общерусинського світа.

Хочеме вернути до його думок, діянь і присутности – не лем як до споминів, але як пункту однесіня для днешніх і будучых бесід о лемківскій ідентичности.

З той причыны хочеме запросити вас на дві стрічы, якы будут присвячены його памяти. В суботу, 5. липця/юлия о 11:30 стрітиме ся на богослужыню на Святій Горі Явір, якє буде правлене в місцевій каплици.

Пак, о 14:30 просиме вшыткых на споминову стрічу до Руской Бурсы в Ґорлицях, де будеме споминати спільны моменты з Покійным Богданом Ґамбальом.