В Сербії жыє о пів міліона менше людей. Войводина стратила понад 180 тісяч жытелів

В октобрі 2022-го року проходило в Сербії списованя жытелів, котре Белеград, єднако як Мадярьско, переніс з 2021-го року. В тых дня были публікованы першы резултаты списованя в Сербії.

Як інформовала аґентура Рутенпрес, за першыма резултатами, котры іщі не обсягують даны о народностных меншынах, Сербія має о пів міліона жытелів менше в порівнаню із списованьом з 2011-го року.

Покля в році 2011 жыло в Сербії 7 186 862 жытелів, в минувшім році то было уж лем 6 690 887 людей. Минусовый розділ творить 495 975 особ. В Сербії ся так в році 2022 записало о 6,9 процента менше жытелів.

Як інформовав Рутенпрес, майже у вшыткых реґіонах зменшыло ся чісло жытелів о коло 10 процент. Вынятком є Белеградьскый реґіон, де проценто населіня наросло о 1,6 процента.

Оптімістічны резултаты не суть ани в Автономній покраїні (области) Войводина. Мултіетнічна часть Сербії, де жыють і войводиньскы Русины, так само в періоді од списованя в році 2011 до минулорічного списованя стратила велике чісло жытелів. Кедь в цілій Сербії жыє о 495 975 людей менше, у Войводині є менше аж о 182 453 жытелів.

Моментално має за остатнім списованьом Войводина 1 749 356 жытелів, в році 2011 їх было іщі 1 931 809. Веце жытелів у Войводині як перед єденадцятьома роками має лем столиця области – Новый Сад.

В році 2011 приголосило ся в Сербії ку русиньскій народности 14 246 людей. При цілковім знижованю чісла жытелів у Сербії мож очековати низше чісло і членів русиньской комуніты.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА