В Стащіні бісідовали о дідовизні Першой світовой войны в Полонинах

О дідовизні Першой світовой войны на теріторії Народного парку Полонины і северовыході Словакії діскутовали у четверь 19-го септембра 2024-го року на варштатах в Стащині, Сниньского окресу.

Цільом той події было споїти самосправы, державны інштітуції і мімовладны орґанізації, жебы діскутовати о ефектівнім справованю той културной дідовизны. Як про аґентуру TASR повіла проєктова манажерка Домініка Кусинова, подію орґанізовала Справа Народного парку Полонины.

„Проєкт GOV4PeaCE є заміряный на створіня сполочной черезгранічной візії про справованя културной дідовизны войновых дій Першой світовой войны. Проєкт концентрує ся на тестованя новых приступів ку дізайну музеїв, творіня черезгранічных трас і підпору меджісекторовой співпраці,“ додала Кусинова.

Участны на варштатах познакомили ся і з можливостями научного баданя і його аплікаційов на охрану і справу памяток. Так само презентованы были успішно реалізованы проєкты заміряны на дії Першой світовой войны. Історіци представили ефектівны приступы ку ряджіню дідовизны з років 1914 аж 1918, в тім чіслі ку стараня ся о войновы цінтері.

Коордінатором проєкту є Мартін Дробняк із Клубу воєньской історії Бескіды. Тот повів, же пригранічны окресы днешнього Пряшівского самосрпавного краю представлюють єдине місце на Словакії, котре почас Першой світовой войны было засягнуте боями.

„Видимым остатком войновых дій на нашій теріторії є комплекс войново-історічных памяток на выходній Словакії. Найвекшу часть того комплексу творять войновы цінтері, котрых є понад 200,“ доповнив Дробняк.

Проєкт GOV4PeaCE реалізованый є од мая 2024-го року до октобра 2026-го року і має 11 партнерів із шестьох держав. Головным цільом є інтеґрація історічных місць Першой світовой войны до шыршых політік і стратеґій охраны културной дідовизны. Фінанцованый є з Европского фонду реґіоналного розвитку.

Фото: Клуб воєньской історії Бескіды.