В Зборові хотять зрядити музейну експозіцію присвячену Русинам

Як інформує аґентура TASR, в Каштелю Шередія із 16-го столітя зрядить село Зборів в окресі Бардейов музейну експозіцію. Буде присвячена Маковіцькому панству, але і културі Русинів.

Подля старосты села Яна Шуркалы є каштель правдоподобно найстаршов світьсков будовов у інтравілані села.

„Дали го збудовати Шередійовы, котры в тім часі властнили Маковіцьке панство. Хосновали го як літню резіденцію. То ставба, котра звонка здає ся, же не є велика, але має пять штоків, пивніці і велику повалу,“ повів про аґентуру Шуркала.

Обєкт быв у минулости хоснованый як уряд лісной справы. У 1969-ім році каштель выгорів, одвтогды будова ішла до занепадку, кедьже не зробила ся нова стріха. Перед семома роками з ініціатівы Здружіня на захрану Зборівского замку і села подарило ся зробити нову стріху.

З проґраму черезгранічной співпраці Interreg V-A Польща – Словакія 2014 – 2020 село здобыло фінанції на проєкт з назвов Забыта країна Лемків і Руснаків. Цільом є реконштрукція каштеля, котру моментално реалізують.

„Хотіли бы сьме там зрядити музейну експозіцію присвячену Маковіцькому панству, але головно лемківско-русиньскій културі. Так є конціпованый проєкт,“ інформовав Шуркала з тым, же іде о сполочный проєкт Зборова, Кружльова і Устя Ґорлицького.

Ставебны роботы, котры почали кінцьом минувшого року, бы мали быти закінчены в децембрі. Окрім сполоченьской салы решту будовы будуть творити музейны експозіції. До будучности мають в Зборові амбіцію, жебы то быв повноцінный музей.

„На єден листок буде годен навщівник посмотрити собі наш музей, музей в Кружльові, як і музей в Устю Ґорлицькім,“ додав Шуркала.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА