Ванессчыны трампоты, або Ванесска і звірята – част #2 – в неділю, 15 мая 19.00 год.

Люба Кральова, предсідателька здружыня «Колысочка – Колыска», просит вшыткых до радийового театру слухати драматизувану приповідку пн. «Ванессчыны трампоты (клопоты), або Ванесска і звірята». Авторком тексту єст Светлана Шковранова – вызначна акторка русиньского Театру ім. Александра Духновича в Пряшові.

Як пише координаторка проєкту – авторску приповідку Светланы Шковрановой выдаєме в єй драматизуваній подобі на компактным диску – про русиньскы діти, іх родичів і про іх дідів і бабы. Желаме си, жебы ся при слуханю приповідкы вшыткы добрі забавили, але і повчыли. Вдяка динамічному текстови Светланы Шковрановой, артистичні управленому паном режысером Ярославом Сисаком про радийо, і вдяка професийональности запрошеных з Театру Александра Духновича в Пряшов акторів, ся подарило добре діло. Віриме, же нашу приповідку будут хоснувати учытелі предшокля і основных шкіл, нашых вечерніх шкіл русиньского языка про діти і дорослых здружыня «Колысочка – Колиска» і так само в радиях, котры высылают про діти – по русиньскы. Жычыме нашій приповідці вельо щестя на пути за дітячом фантазийом.

Драматурґія: Ярослава Сисакова, Режысерия: Ярослав Сисак

Особы:

1. ВАНЕССКА – Зузана Ковальчыкова

2. БАБКА – Светлана Шковранова

3. ЛИШКА – Ярослава Сисакова

4. ВОЛК – Василь Русиняк

5. МЕДВІД – Любомир Миндош

6. ЗАЯЦ – Ігор Латта

7. СОВА – Людмила Козменко

8. ПЕЛЕХАЧ – Ладислав Ладомиряк

Сценічна музыка – Осиф Гарнічар

Друга част слуховиска в радию ЛЕМ.фм в неділю, 15. мая 2016 р., о 19.00 год. Повторіня 16. мая о 01.00, 07.00 і 09.30 год., а дале  21 мая о 12.30, за русиньскым часом.