Великодны звыкы одкрыють вєдно із історічныма фотоґрафіями Підкарпатя

Вже є традіційов, же Словeньскый народный музей – Музей русиньской културы в Пряшові приготовлює перед Рождеством і перед Великоднем експозіції, котры презентують звыкы і традіції Русинів повязаны з тыма двома найвекшыма святами в році.

Так тому буде і в четверь 17-го марца 2016 р., коли русиньскый музей одкрыє выставку під назвов „Великодны звыкы і традіції Русинів“. Выставка, на котрій буде мож видіти традічны русиньскы писанкы, но і далшы артефакты повязаны зо святом Пасхы, святочно одкрыє ся о 15.30 год. в просторах музею на уліці Масаріковій ч. 20 в Пряшові.

Но в тот день музей не одкрыє лем выставку повязану із Великоднем. Як інформовала директорка СНМ – Музею русиньской културы Ольґа Ґлосікова, в просторах музею буде в четверь одкрыта і експозіція історічных фотоґрафій із Підкарпатя (Ужгород, Мукачево ітд.).

Припоминаме, же русиньскый музей у Пряшові є про навщівників одкрытый каждый робочій день од 9.30 год. до 15.00 год. Кажду першу неділю в місяці мож музей навщівити од 10.00 год. до 15.00 год. В тот день є вступ бесплатный.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫК