Велия Народів в Ліґници

Місто Ліґниця то тиґєль вельох народів. Єдны пришли там з власной волі – другы были беззаконні выгнаны з рідных земель і під примусом привезены на тзв. Землі Одзысканы. Вшытко тото справило, же уж 70 років жытелі Ліґниці жыют попри собі, плекаючы традицию, язык, культуру предків.

Зато, жебы хоц раз в році ліґницкы нацийональны і етнічны меншыны мали змогу ся стрітити і вымінити одчутями та зложыти сой желаня, од парох років в Ліґници є орґанізувана святочна стріча пн. Велия Народів. В стрічы каждий рік берут участ представникы ріжных меншын, жыючых на ліґницкій земли, м.ін. Ромы, Росияне, Украінці, Німці, Жыди, Грекы, Туркы і Полякы. В тым році не бракне і Лемків, котры будут репрезентуваны представниками Стоваришыня Лемків – найстаршой русиньской повыселенчой орґанізациі в Польщы.

Стріча одбуде ся в неділю, 20. грудня/децембра т.р., од 17.00 год. в Ліґницкым Центрі Культуры. Кажда з ґруп зрыхтує традицийны велийны стравы, прибере ся в народне облечыня та заколядує в языку своіх предків. На лемківскым столі напевно не бракне кєселиці, а і стародавна лемківска коляда Бог предвічний напевно вызвучыт в неділю в просторах ЛЦК.