Венеційска комісія проаналізує україньскый народностный закон

Як інформовав портал Європейська правда, Венеційска комісія слідуючіх пять місяців буде аналізовати україньскый закон о народностных меншынах, котрый Верьховна рада прияла 13-го децембра минувшого року. Венеційска комісія о тім інформовала 2-го фебруара 2023-го року.

„На жадость ведучого Моніторінґового комітету Парламентной асемблеї Рады Европы із 30-го януара 2023-го року Венеційска комісія приготовить становиско што до закона Україны О націоналных меншынах (комунітах),“ пише ся в оголошіню. Пропозіція становиска піде на схваліня на 135-те пленарне засіданя комісії, котре одбуде ся 9-го і 10-го юна того року.

Народностный закон є меджі семома рекомендаціями Европской комісії, котры Україна повинна сповнити, жебы могли далше іти їднаня о вступі до Европской унії.

В рекомандаціях Европской комісії ся пише, же закон має взяти до увагы припомінкы Венеційской комісії. Но Україна ся не звертала до комісії із жадостьов о проаналізованя пропозіції закона перед тым, як Верьховна рада дістала на схваліня закон, котрый депутаты одголосовали в децембрі.

Притім депутат парламенту і член комітету про людьскы права, деокупацію і реінтеґрацію дочасно окупованых теріторій, народностны меншыны і меджінародны односины Тарас Тарасенко втогды у выголошіню публікованім на сайті Верьховной рады Україны припоминав, же його комітет на тім робив два рокы.

Кедьже аналіза україньского народностного закона буде тырвати пять місяців, Україні зістане менше часу на то, жебы оправити потенціалны припомінкы односно закона іщі перед оцінков їй евроінтеґрачного проґресу, котра має проходити в осени того року.

Венеційска комісія є порадным орґаном Рады Европы. Задачов того орґану є давати правну поміч своїм членьскым державам або державам, котры хотять у своїм правнім порядку досягнути европскый штандард в области демокрації, людьскых прав і правной державы.

Так само помагать розшырьовати і укріпляти общі конштітучноправны прінціпы. Забезпечує і правну поміч почас трансформації правной сістемы державы.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА