Вертат Обзерач Природы! Таємниці першого одтинка

Пришла осін. Листя на деревах робит ся жолте, вечеры сут штораз долшы, за выглядом авра не заохочує до далекых екскурсий. Єст то найліпшый момент, жебы вернути з новом серийом одтинків природничой авдициі Обзерач Природы і запропонувати Вам спільный час в подорожы, але на антені ЛЕМ.фм.

Обзерач Природы то авторска авдиция, в котрій беру слухачів на малы вандрівкы найкрасшыма закутинами світа – не лем нашого, лемківского. Як в попередніх одслонах проґраму, так і в тій, буду бесідувал о природничых атракциях, але з малом ріжницьом. В найновшій сериі бесіды будут тримати ся єдной, головной темы, яком будут «нацийональны паркы в Польщы». В каждым одтинку підеме до інчого парку і будеме одкрывати найбарже інтересуючы факты тыкаючы істориі і природы. Де підеме в першій одслоні новой сериі?

Думам, же на початок добрі познати тото, што маме найближе. Возму Вас до Маґурского Нацийонального Парку, котрый находит ся як раз на Лемковині, медже Бортным а Крампном, на граници малопольского і підкарпатского воєвідств! Коли докладні возникнул тот парк? Яку обшыр занимат? Што докладні находит ся в ним під охороном? Ци фактичні маме чым ся  гордити, маючы за углом нацийональный парк?

Вшыткы квестиі поясню Вам уж в найблизшу пятницю 24. жолтня/октобра о 13.00 год. Проґрам буде повтаряный в суботу 25. жолтня/октобра о год. 7.30 та в середу 29. жолтня/октобра о год. 4.30.

До стрічы на (радийовым) шляку!

джерело знимкы: Якуб Зиґмунт та Якуб Сырек (Jakub Syrek, Wikimedia Commons, CC BY-SA 3.0 pl)