Вігорлатьскый музей припоминать собі сто років од народжіня Ореста Дубая

15-го авґуста 2019-го року минать точно сто років од народжіня вызначного русиньского вытварника Ореста Дубая. Із той нагоды приготовив Вігорлатьскый музей в Гуменнім выставку выберу з богатой творчости того родака із Великой Поляны, днесь вже неіснуючого села, котре было в окресі Снина.

Як інформовала Яна Федічова, святочна вернісаж выставкы під назвов Орест Дубай, котра буде повязана з презентаційов книжнкы з єднаков назвов, і котра выходить словацько-русиньско-анґліцькій верзії, одбуде ся 15-го авґуста 2019-го року зо зачатком о 16.00 год. в концертній салі Вігорлатьского музею. Подію підпорив Фонд на підпору културы народностных меншын.

Орест Дубай

Орест Дубай народив ся 15-го авґуста 1919-го року. Быв то малярь, ґрафік, скулптор, ілустратор і педаґоґ. Належав ку особностям основательской ґенерації ґрафіків на Словакії. Штудовав на Руській ґімназії в Мукачові, пак продовжовав штудовати рисованя на Словацькій высокій школі технічній в Братіславі, де было Одділіня вытварного уменя і рисованя.

Вчіли го вызначны словацькы умелці як Ян Мудрох, Мартін Бенка і далшы. Од 1945-го року головным жанром стала му ґрафіка. Од 1947-го року быв асістентом Коломана Сокола на Педаґоґічній факулті Універзіты Коменьского в Братіславі – Катедрі вытварной выховы. Пізніше быв і ректором Высокой школы вытварных умень в Братіславі.

На домашній і загранічній вытварній сцені актівно діяв уж од 1941-го року. Быв членом дакілько вытварных ґруп, переданы му были вызначны домашні і загранічны оцініня, наприклад тітул народного умелця.

Знамы суть його творы Токаїк in memoriam 19. XI. 1944 із 1949-го року, ілустрації в книжці поезії Богдана Ігоря Антоніча, є автором мозаікы в шпыталю в Бардейові, робив декоратівне скло про Chemko Strážske, композіції на фасаді будовы пивовару у Великім Шарішу, тапісарії на Братіславскім замку.

В роках 1988 аж 1989 подаровав Орест Дубай велику колекцію майже 800 своїх творів Вігорлатському музею в Гуменнім, котре втогды было іщі Краєзнавчім музейом, як іншпіратівный дар музею в роднім краю. Од 1994-го року має музейна ґалерія честну назву Ґалерійна сінь Ореста Дубая.

Дубай вмер 2-го октобра 2005-го року в Братіславі. Гуменне му при нагоді 700-ой річніці од першого писемного документу о місті в році 2016 уділило Ціну міста Гуменне. Вігорлатьскый музей собі тот рік припоминать нелем сторічніцю од його народжіня, але і 25 років існованя ґалерії з його меном.

Выбер із подарованой колекції

Актуална выставка походить зо збіркового фонду Вігорлатьского музею в Гуменнім і представлює часть з подарованой колекції Дубайовых творів. Навщівници будуть годны видіти творы з богатой ґрафічной творчости, мальбы, ужыткову ґрафіку (exlibris, поштовы маркы), ілустрації, ідейовы пропозіції творів, пластікы з каміня, порцелану, дерева і ґіпсу.

Юбілейну выставку доповнюють запожычены родинны фотоґрафії, особны предметы автора і вытварны творы сучасных авторів родины Дубайовых.

Як інформовала Федічова, остатня комплексна выставка творів Ореста Дубая у Вігорлатьскім музею одбыла ся у 2009-ім році із нагоды недожытых 90-тин автора. В роках 2016 і 2017 зробив музей дві меншы выставкы ґрафікы під назвов О вічній тузі чоловіка… Ґрафіка І. і Ґрафіка ІІ. Выставка з нагоды сторічніці од нардожіня Ореста Дубая буде приступна до 31-го октобра.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА