Влада засідала у Вышнім Верлиху. Роздала понад 2,5 міліона евр

В середу 26-го новембра 2025 влада Словацькой републікы абсолвовала далше своє выїздове засіданя. Тот раз пришла до русиньского села Вышній Верлих, Свідницького окресу. На розвиток і потребы самосправ, орґанізацій і комуніт в двох русиньскых окресах – Свідник і Меджілабірці, а Стропківскім окресі, де так само суть і русиньскы села, влада выділила понад 2,5 міліона евр.

„Понад 1,9 міліона евр із цілковой выділеной сумы є встановленых на проєкты сел і міст окресів Свідник, Стропків і Меджілавбірці, і іншых юрідічных особ, решта на векшы проєкты, в рамках шыршого реґіону,“ цітовала аґентура TASR председу влады Словацькой републікы Роберта Фіца.

Вышній Верлих, котрый гостив засіданя влады, дістане 50 000 евр на реконштрукцію Дому културы, русиньске село Выкроп у Стропківскім окресі дістане 40 000 евр на реконштрукцію будовы бывшой школы із заміром вытворіня музея Першой світовой войны. Грошы має дістати наприклад і Православна церьковна общіна у Свіднику на реконштрукцію стріхы дзвониці коло церькви.

Роздавали ся і задачі

В узнесіню, котре было владов прияте, суть і конкретны задачі про окремы міністерства а шефів резортів. Підпредсидателька влады і міністерка господарьства Деніса Сакова має продовжовати в гляданю новых інвесторів, включно потенціалных проєктів етаблованых выробных фабрик в окресах Свідник, Стропків і Меджілабірці.

Так само має обговорити із представителями компанії Volvo Car Slovakia, котра будує фабрику коло Кошыць, можливость розмістніня промысловых капаціт на выробу частей про електромобілы в окресах Стропків і Свідник.

Задачі дістали і віцепремєр а міністер жывотного оточіня Томаш Тараба, міністер транспорту Йозеф Раж, міністер інвестіцій, реґіоналного розвитку і інформатізації Самуел Міґаль, ці міністер турістічного руху і шпорту Рудолф Гуліак. Векшына задач має быти сповнена в слідуючім році, дакотры до половины року.

Потенціал Меджілаборець і грошы про україньскый музей

Міністерка културы Мартіна Шімковічова має вєдно із міністром турістічного руху Гуліаком а уповномоченым влады СР про народностны меншыны Акошом Гороньом „обсудити можливости підпоры розвиткового потенціалу окресу Меджілабірці в области културного турізму і захованя културной розмаїтости як части розвитку реґіону і його ідентіты“.

Премєр в повязаню із тым говорив о намазі створити мануал. За його словами было доїднано, же міністерка културы як коордінаторка стрітить ся із вшыткыма заінтересованыма, і спробують створити пілотный проєкт схоснованя реґіоналного потенціалу про звекшіня турістічного руху. Припомянув притім плановане одкрытя зреконштруованого Музея модерного уменя Енді Варгола в Меджілабірцях, але і потенціал далшых унікатных і природных красот, котры знає тот реґіон северовыходной Словакії дати про розвиток турізму.

Шімковічова на своїм офіціалнім профілі на сіті Facebook о тых актівностях інформовала, а спомянула і то, же на основі днешнього засіданя влады Словацькый народный музей – Музей україньской културы у Свіднику дістане 10 000 евр на створіня народописной експозіції в природі, котра розшырить понуку музея, і сприступнить културну дідовизну реґіону шыршому округу людей.

Припоминаме, же русиньскы орґанізації довгодобо вказують на факт, же в україньскім музею суть русиньскы артефакты, котры наперек тому, же перешло 36 років од політічных змін в бывшій Чехословакії, суть презентованы як артефакты україньской културы. Вшыткы намагы о то, жебы збірковы фонды были делімітованы і переведены на СНМ – Музей русиньской културы в Пряшові, дотеперь не были успішны.

Так само будова русиньского музея в Пряшові потребує велику реконштрукцію, на котру словацькы влады довгодобо не знають найти грошы.