Вламаня до Музею Лемківской Культуры в Зындрановій

Як заявило на фейсбуковым фанпейджы та своім сайті Товариство для Розвитку Музею Лемківской Культуры в Зындрановій, вночы з 17. на 18. січня/януара т.р., мало місце вламаня до єдного з будинків, якій входит в склад музейного комплексу. Незнаны справці знищыли желізну крату, колодкы,  а пак розшабрували поміщыня, в котрым наштоден находят ся памяткы повязаны з І та ІІ Світовыма Войнами і Дукляньском Операцийом, з котрой слыне Зынданова і поблизкы русиньскы териториі. Злодіі вкрали м.ін. войсковы мундуры, гелмы, кавальці войскового оружа, баґнеты, брячкы до поясів та другы експонаты. Окрем крадежы, як видно на залученых долов фотоґрафіях – столчено музейны ґабльоты. На днешній ден, точны страты не сут знаны.

Музей Лемківской Культуры в Зындрановій апелює до жытелів села, але і каждого хто реченой ночы міг видіти дакы ознакы, повзязаны зо злодіями, жебы зголосити іх опікунам музею або Поліциі.

фот. горі: Фейсбуковий фанпейдж Музею Лемківской Культуры в Зындрановій; головна фот.: Вікіпедия