Вмер Іван Ґоч (1930-2025), лемківскій гудак, автор рекордів з нашом музиком

З жальом подаєме, што 25. листопада/новембра 2025 р., на 96 році жытя вмер в Канаді Іван Ґоч, знаный в лемківскым музичным світі днес уж з культовых награнь народных пісен.

Іван Ґоч народил ся 28. вересня/септембра 1930 р. в Зындрановій в родині Миколая і Анны з д. Мацек. Был молодшым братом лемківского діяча і основателя Музею Лемківской Культуры в Зындрановій – Федора Ґоча (1928 – 2018).

Бл. п. Іван Ґоч враз з братом Федором 1. вересня/септембра 1942 р. пішли до пятой клясы школы в Дукли. В тым часі мешкали в дукляньскій бурсі. Музикувати вчыл ся іщы в рідным селі – за споминами Феодра Ґоча публикуваныма в книжці «Жытя Лемка» – брат Ваньо Ґоч вчыл ся гры на гушлях в зындранівского Циґана – Грица Сивака. В 1947 р. Іван Ґоч враз з мамом і дальшом родином были выгнаны в рамках акциі Вісла (в тым часі розлучыли ся з Федором, якій был поневеленый польском безпеком).

В 1948 р. Іван Ґоч враз з мамом выіхал до Канады до вітця (отец Миколай Ґоч выеміґрувал іщы в 1930 р.). «Якє то было для нас родинно і окремо для мене додаткове тернисте пережытя. Пашпорты были готовы і для мене. Мама пришли скорше до ня в липци звідувати ся, ци они обоє мают чекати на мене, коли я выйду з тюрмы, ци мают ня лишыти і самы іхати. Я з великым больом повіл Мамі, же конечні най іхают, хоц они обоє, бо так вымагат жытя, жебы родину лучыти, а я незнати ци і коли выйду, бо то незнана доля. А коли выйду то за нима приіхам, як ня пустят. Стало ся потім єднак іканше. Мама і брат послухали моіх рад і николи не забуду як брат Ваньо хотіл цілувати мі рукы, якы я затримал. Нашы жалі і плачы нич не помогли. Мі было барз тяжко оставати, лем свідоміст лучыня родины была высша» – споминал по роках Федір Ґоч.

Іван Ґоч першыраз одвиділ Старый Край в 1963 р. Прожывал в Торонто, де робил як желізнодорожный інжынєро – контролер канадийскых колейовых установ в окрузі Онтарьо. На еміґрациі Іван Ґоч долгы рокы орґанізувал лемківску капелю. Окрем гушель, грал тіж на клярнеті і саксофоні. Враз з камаратами-гудаками выдали пару рекордів з лемківском народном музиком. Оркєстра Івана Ґоча спілпрацувана тіж з «Тріо Верховина», з котрым выспівували так само украіньскы співанкы.

Серед пісен Івана Ґоча є і знана патріотична – «У горах Карпатах», яка в неприязным часі была покріпліньом для выселенців в Старым Краю. О істориі пісні розповідал перед роками в нашым радию Ярослав Трохановскій (долов фраґмент авдициі).

Бл. п. Іван Ґоч залишыл по собі музичну спадковину – давны пісні з Лемковины, якы днес – являют ся уж культовым награньом.

Вічна Йому Памят!