Вмер Іван Туряниця. Професор, політік і русиньскый актівіста

Як інформовала Ужгородьска націонална універзіта, 9-го апріля 2023-го року перестало быти сердце нашого вченого, доктора біолоґічных наук, професора, славного ведучого Катедры біохемії і фармаколоґії Ужгородьской державной універзіты – Івана Туряниці.

Іван Туряниця быв актівный і в русиньскім русі по 1989-ім році, быв членом Світовой рады Русинів і понад десять років быв головов Общества карпатьскых Русинів. Мав 80 років.

Русиньскый вченый

Народив ся Іван Туряниця 16-го януара 1943-го року в родині учітелів русиньскых школ в селі Микулівці. Втогды Підкарпатя было теріторійов окупованов Мадярьском. У 1959-ім році пішов штудовати на Черкаську універзіту, на Природознавчу факулту, яку успішно закінчів у 1964-ім році за шпеціалізаційов біолоґія – хемія.

По штудіях учітельовав на середніх школах Закарпатьской области. У 1968-ім році по конкурзі здобыв посаду наукового співробітника Катедры біохемії і фармаколоґії Медициньской факулты Ужгородьской державной універзты. О три рокы пізніше успішно оборонив кандідатьску дізертацію.

За досягненя в науці у 1976-ім році быв удостоєный званьом старшого наукового співробітника, выкладав біохемію штудентам Медициньской і Біолоґічной факулты. Од 1987-го року быв доцентом. О рік пізніше оборонив докторьску дізертацію на Катедрі біохемії Медициньской факулты на Універзіті дружбы народів імени Патріса Лумубы в Москві. Од року 1990 быв професором.

Од 1989-го до 2000-го року занимав посаду ведучого Катедры біохемії і фармаколоґії Медициньской факулты Ужгородьской державной універзіты. Почас свого діяня приправив 11 кандідатів наук у 4-ох докторів наук.

Од 2000-го до 2018-го року учів на Словацькій польногосподарьскій універзіті в Нітрі, де під його веджіньом были оборонены штири дізертації на ступень доктора філозофії, і опублікованых было понад 40 науковых робот.

За резултатами науковой роботы Іван Туряниця має приписаных понад 400 науковых публікацій і 25 патентів.

Іван Туряниця быв записаный до книгы Найпопуларнішы люди Україны, а його популарность росла і за граніцями, і так його мено записане было і до книгы найзнамішых людей планеты. У 2004-ім році Світовый науковый комітет у Кембріджі нагородив до Діпломом Славы за выдатны досягненя в біохемії.

Політік і русиньскый актівіста

В постсовітьскім періоді Іван Туряниця одкрыто выступав за автономію Підкарпатьской Руси (Закарпатьской области Україны) в рамках Україны, што быв і резултат референдума з 1991-го року, і за офіціалне вызнаня Русинів як окремого народа. Свої погляды пропаґовав почас навщів у різных европскых країнах.

В роках 1994 аж 1998 быв депутатом Закарпатьской областной рады. Головов Общества карпатьскых Русинів быв од 1992-го до 2004-го року. Почас того періоду, в роках 1993 аж 2001, быв і членом Світовой рады Русинів за Україну.

Іван Туряниця закликав до кодіфікації русиньского языка на Підкарпатю, сам є автором збіркы русиньской поезії, котра вышла під назвов Рудна земле пудкарпатська у 1999-ім році. Вічная память!

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА