Вмер Миломір Шайтош, хореоґраф, културно-общественный діятель із Нового Саду

Як інформовала аґентура Рутенпрес, в неділю 20-го юла 2025-го року вмер Миломір Шайтош, довгорічный русиньскый діятель і актівіста, хореоґраф Русиньского културного центра в Новім Саді. По куртій і тяжкій хвороті вмер у віці 65 років.

Миломір Шайтош быв почас свойой професіоналной карьєры на многых посадах. Актівный быв і в рамках штруктур Світового конґресу Русинів. Быв основательом Русин філм фесту, котрый орґанізовав ся в Шіді.

Народив ся Миломір Шайтош 6-го юна 1960-го року в Новім Саді, втогды Югославія. Мав музичну освіту, быв абсолвентом новосадьской Академії умень. В роках 1977 аж 1986 із перервами робив у Радію Новый Сад, наперед іщі як штудент середньой школы, пізніше як співпрацовник і редактор. Робив на музичных проґрамах.

Окрім музичной освіты вышколовав ся за проґраматора, пізніше в тім фаху і робив аж до одходу на пензію.

Од дітинства быв членом Културно-умелецького дружства Максим Ґорькый, де перешов вшыткы етапы фолклорного танечника. Абословав 8 семестрів штудій про кадры в области танечно-фолклорной творчости із окремым акцентом на навчаня історії танців, народной одежды і сценічной обробкы танців.

Од 2003-го року быв хореоґрафом Русиньского културного центра в Новім Саді, як хореоґраф дві сезоны діяв і в Шіді. Поставив коло 15 авторьскых хореоґрафій. Написав дакілько статей із области русиньского фолклору і фолклорістікы.

Миломір Шайтош быв довгы рокы і делеґатом засідань Світового конґресу Русинів (СКР) за Сербію, конкретно за членьску орґанізацію Руска матка. Быв членом, пізніше председом Конґресовой комісії про културу СКР, співпрацовав із хореоґрафами вызначных русиньскых фолклорных ансамблів, наприклад на Словакії. В рамках орґанізації Руска матка быв на посадах заступника председы, а так само і председы Новосадьской містьской орґанізації Руской маткы.

Довгы рокы Шайтош співпрацовав із фолклорістом, етнолоґом і етномузиколом Іваном Чіжмарьом із Свідника в рамках творіня проєкту зборника русиньской народной одежды із цілого ареалу, в котрім жыють Русины.

Влада Автономной покраїны Войводина го в році 2017 на єден функчный період выменовала на функцію председы Справной рады Інштітуту про културу войводиньскых Русинів. Почас свого функчного періоду намагав ся здобыти про Інштітут новы просторы в Новім Саді, што ся і подарило.

Быв членом Совіту про народностны меншыны і членом Совіту про молодых Міста Новый Сад. Так само быв дакілько функчных періодів членом Націоналного совіту Русинів, самосправного орґану русиньской народностной меншыны в Сербії.

Як председа Справной рады Дружства Русинів Нового Саду – Войводины, брав участь на основаню Фестівалу малых сценічных форм у Новім Саді, фестівалу орхестрів під назвов Мелодії русиньского двора, і фестівалі Русин філм фест в Шіді. Вічная память!