Вмер Славомир Канюк. Хориста, дяк, вірный Лемковині

Днес, 9 марця 2026 рока, на 53 році жытя, по долгій і тяжкій хвороті вмер Славомир Канюк – дяк, член лемківскых хорів, одданый парохіянин православной парохіі Покровы  Пресвятой Богородиці в Ганчовій. Як подала Канцелярия Православного Архієпископа Перемышльского і Ґорлицкого – похорон одбуде ся в середу о 10.00 год.

Запамятаме го як щырого, милого, приязні успособленого і все усміхненого колеґу з ріжных хорів. Все зрыхтуваного, жычливого і доброго чловека.

Народил ся Славомир Канюк 21. лютого/фебруара 1973 рока в Креници в родині Йоана і Наталиі Канюків. Абсольвувал студиі на Християньскій Теолоґічній Академіі в Варшаві. Званя маґістра теолоґіі здобыл в 1997 році, оборонил роботу на тему «Іконоґрафія православной церкви в Ганчовій».

Уж підчас студиюваня брал активну участ в літургічным жытю Церкви. Послугувал як дяк в парохіях в Ганчовій і Высовій. Был заанґажуваным парохіянином, опроваджал по церкви в Ганчовій.

Од все співал. Долгы рокы был членом Молодіжного Хору Православной Перемышльско-Новосандецкой Єпархіі «Ірмос», якій прикрашал співом єпархіяльны праздникы, очолюваны бл.п. владиком Адамом, на котрых Славко все был присутный. З хором тым концертувал, так само як і з Мужскым Камеральным Хором «Клірос», якій діє при Осередку Православной Культуры «Ельпіс» в Ґорлицях.

Анґажувал ся не лем в реліґійне, але тіж соспільне жытя лемківской спільноты. Будучы членом креницкой православной парохіі брал участ в театрально-музичных видовисках, якы рыхтувал Петро Мурянка-Трохановскій. Представліня тыкали історичных тем звязаных зо спадковином Лемків, вказуваны были при нагоді пропамятных стріч і церковных торжеств. Свій талант до співаня (был тенором) розвивал тіж в світскым хорі «Зоря» з Устя Руского. Был глубоко звязаный з Лемковином. Плекал памят о істориі родины, опікувал ся гробами предків в родинній Фльоринці.

В 2007 році оженил ся з Сильвійом Міськович з Ганчовой. Был одданым мужом і вітцьом. Осиротил троє діти. З дбалістю старал ся о схвореных родичів аж до іх смерти.

Похоронны богослужыня зачнут ся в віторок 10. марця o 18.00 год. одслужыньом Парастасу в церкви Покровы Пресвятой Богородиці в Ганчовій. В тій же церкви в середу 11. марця о 10.00 год. одбуде ся Літургія Преждеосвященных Дарів з чыном отпіванія.