Выходна Словакія почала співпрацу із Закарпатьсков областьов у области транспорту

Выходна Словакія почала співпрацу із Закарпатьсков областьов Україны в области транспорту. Сполочный проєкт заміряный на актуалізацію і створіня скапчаного моделу транспорту має овпливнити можливости подорожіня меджі тыма країнами – од автобусів аж по штреку.

IDS Východ (Інтеґрована сістема транспорту Выход) вєдно із партнерами із Україны – Інштітутом розвитку Карпатьского реґіону і Службов обновы і розвитку інфраштруктуры в Закарпатьскій области, наштартовали проєкт OTRACON SK-UA.

Проєкт має подля IDS Východ принести співпрацу меджі Словакійов і Українов у области мобіліты і транспорту. Цільом є гармонізовати транспортны споїня і вєдно плановати гранічны переходы про вшыткы тіпы транспорту.

„Проєкт заміряный є на два ключовы крокы. Першым є актуалізація моделу транспорту выходной Словакії в пригранічных областях. Другым є створіня моделу транспорту Закарпатьской области. Обидві рішіня будуть взаємно перекапчаны і управлены подля резултатів бадань транспорту, котры будуть проходити на словацькім і україньскім боці,“ описав заміры проєкту шеф IDS Východ Радован Гужвік.

За його словами буде важным на основі даных задефіновати оптімалне чісло і штруктуру гранічных переходів розділеных подля тіпу транспорту, ці то буде особный, накладный, желізнічный або драговый.

Выступы проєкту послужать подля ІDS Východ самосправам і державным інштітуціям в обидвох державах. Будуть фундаментом про актуалізацію Планів утримательной мобіліты Кошыцького і Пряшівского самосправного краю, што представлює основный пункт про черьпаня европскых фондів на проєкты в области транспорту. Резултаты проєкту овпливнять в будучности і можливости подорожіня меджі Словакійов і Українов.

В найблизшім півроці буде робити ся списованя (зрахованя) транспорту, обробліня і оцінка даных, і фіналізація моделу транспорту в Закарпатьскій области.

„Проєкт OTRACON SK-UA, якый фінанцованый є із проґраму INTERREG NEXT HU-SK-RO-UA, представлює фундамент на обєктівне оціньованя замірів при модернізації транспорту і створіня коордінованого і тырвало утримательного транспортного оточіня меджі Словакійов і Українов, головно в контексті очекованого роснутя мобіліты при будучій господарьскій обнові Україны,“ пише ІDS Východ.

IDS Východ (Integrovaný dopravný systém Východ) є комапнія, котрой маїтелями суть Кошыцькый самосправный край і Пряшівскый самосправный край. Выникла у 2019-ім році з цільом выбудовати модерну, про людей атрактівну сістему публічного транспорту.

До сістемы суть залучены влакы, автобусы і містьскый транспорт в споминаных двох самосправных краях. IDS Východ уможнює путуючім на єден листок путовати посередництвом вшыткых доступных тіпів публічного транспроту з тым, же мож меджі нима переступити, жебы дістати ся до ціля купленого листку.