Вышла нова книжка про діти од Марії Шмайдовой

Перед роком дебутовала із своїма текстами в рамках 6-го річника Літературного конкурзу Марії Мальцовской авторка Марія Шмайдова. Были то оповіданя про діти. Выграла третє місце. В тых днях з друку вышла їй дебутова книжка під назвов У дїдка на дворї, котру выдав Сполок русиньскых писателів Словеньска.

Марія Шмайдова (1964) своє ціле дітинство пережыла у Свіднику. Выштудовала Середню педаґоґічну школу в Пряшові, пізніше і Педаґоґічну факулту Конштантіна Філозофа в Нітрі. 22 років учітельовала на школах Свідницького і Стропківского окресу. Теперь вже 16-ый рік робить на Школьскім уряді в Стропкові.

Дебутова книжка Марії Шмайдовой є збірков 17-ох куртых оповідань про діти, котры обогатила ілустраціями Славка Самчікова.

„Сполочні пережыти найкрасшы моменты з тыма найменшыма з родины – із своїма внучатами, Марія Шмайдова пробовала зафікстовати до куртых повідань. Так ожывать мале русиньске селечко на кінцю світа – Потічкы. Ту ся одогравають чаровны пригоды бабкы Марінкы і єй внучать – Тімонка, Біанкы, Танічкы і Ганічкы,“ пише ся в анотації книжкы.

Книжка є так дакус і інтерактівна. По каждім оповіданю найде малый чітатель, або тот, хто то дітині чітать, вопрос, на котрый треба одповісти. І так ся мож з дітми забавити і по дочітатю короткого тексту.

Книжка Марії Шмайдовой є писана по русиньскы азбуков, но в задній части найдеме переписі оповідань і до латинікы в русиньскім языку.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА