Як то ся робит і кус о Різдві – ч. І – «70%» – неділя, 18.00 год.

«А преці каждый тото потрафит!» – подумала єм сой, рыхтуючы до ефіру котрысу передачу «70%». Є, дорогы слухачы, каждый тепер потрафит записувати спомины діда ци бабы – навет лінивый. Бо всядиль єст техніка, яком легко тото зробити. То чом то мам робити лем я?! Та же тото годен робити каждый з вас!

Є, тото зробит каждый, кєд… го кус підовчыти. Як раз зачынаме новый цикль передач, де будете чути не лем бесіды з людми, але і будеме выяснювати, як то ся робит. Дознате ся при тым дашто о роботі журналистів, а тіж ріжны хытрости і секреты, якы помагают ім успішні рыхтувати своі материялы і уникати проблемів.

Тот цикль передач вартат слухати з бльокнотом в руці, бо, може, вартат дашто даколи і записати сой – може, ся придаст. І придаст ся не лем будучым журналистам, а і звыклым слухачам нашого радия.

І рахуєме барз на вашу спілтворчіст, на ваше спілдіяня, на ваше реаґуваня. Ото же тепер, по переслуханю той передачы – напиште-ле, ци вам было цікаво, ци дашто з того вам ся придало? Што іщы хотіли бы сте ся дознати? Ци вам ся сподабала тота передача, ци ніт? Барз чекаме на звісткы од вас, дорогы слухачы!