З чужыны до святого місця Лемковины

Текучый рік є вынятковый – кєд же споминаме 100 років од обявлінь Пресвятой Богородиці на Святій Горі Явір. З той причыны уж неодолга пройдут торжественны богослужыня, якы припомнут як раз тот ювілей.

До святкуваня рыхтує ся уж православна Церков. В першій черзі то тырваюча будова новой православной святыні на горі Явір, яка має быти памятком округлой річнициі обявлінь, 100. річниці повороту Лемків до православя і даром подякы за автокафелию православной Церкви в Польщы. Влони посвячено угольный камін під будову храму.

Праздник свв. Апостолів Петра і Павла на Святій Горі Явір то вынятковый ден в році для вірных православной Церкви. Од років одбывают ся тіж поломництва. Путуют не лем жытелі Лемковины, але і Русины з Пряшівщыны та вірны з ріжных дальшых части Польщы.

Того рока тіж придут поломникы з чужыны – західніх земель Польщы, в більшости уж потомны давных жытелів Лемковины. Поломництво одбуде ся з благословліня архієпископа Юрия, владыкы вроцлавско-щеціньской єпархіі ПАПЦ. За орґанізацию одповідат вроцлавскє Стоваришыня Свв. Апостолів Петра і Павла.

Поломництво з західніх земель одбуде ся в днях 11.–13. липця/юлия – так, жебы вірны могли взяти участ в головным празднику – 12. липця/юлия в ден Первоверховных Апостолів Петра і Павла. Зачне ся оно 11. липця/юлия выіздом спід православной церкви в Ліґници. Одтамале поломникы підут через Любін до Вроцлавя, де досядут дальшы участникы. Кошт поломництва то 700 зл. Зголошыня треба подавати до 15. червця/юнія, м.ін. на е-майльовый адрес: stowpraw.wroclaw@interia.pl.

По Лемковині тіж перейде традицийне поломництво. Як поінформувало Братство Православной Молодежы Перемышльско-Ґорлицкой Єпархіі, з благословліня архієпископа Паісия, місцевого правлячого архієрея, в днях 10.-12. липця/юлия одбуде ся ювілейне 35. Православне Поломництво на Святу Гору Явір. Зголосити свою участ треба до неділі 6. липця/юлия – дрібниці мож найти на фейсбуковій стороні Братства.

Поломництво зачне ся од св. Літургіі в четвер 10. липця/юлия о 8.00 год. в православній церкви св. Владиміра Великого в Креници. Першого дня поломникы перейдут трасу до Баниці. Другого дня, в пятницю о 8.00 рано на місцевым цмонтери одслуженый буде парастас за помершых жытелів Баниці. Пак поломникы підут через Снітницю, Ставишу і Ріпкы до Ганчовой. О 17.00 год., в велию свята Первоверховных Апостолів Петра і Павла, служена буде Всеночна в церкви Покровы Пресвятой Богородиці в Ганчовій (ту як раз долучат поломникы з вроцлавско-щеціньской єпархіі).

В суботу о 7.00 рано, в сам ден праздника, в ганчівскій церкви служеный буде молебен. О 9.00 год. при церкви Архістратига Михала в Высовій привитаны будут прибывшы єрархы, а пак вірны выйдут на верх Святой Горы Явір. Свята Літургія на Горі Явір зачне ся о 10.00 год.

Празднуваня ювілею обявлінь рыхтуют так само вірны грекокатолицкой Церкви. О деталях будеме іщы інформувати.