За культуру в Пшемкові буде одповідал Лемко. Данько Горощак покликаный на директора ПОКіБ

Як поінформувало місто Пшемків, од 3. квітня/апріля 2026 р. новым директором Пшемківского Осередка Культуры і Бібліотекы стал Данько Горощак, локальный активіста, заанґажуваный в лемківску діяльніст.

На функциі заступил попередню ведучу. Офіцийне покликаня одбыло ся при участи бургомайстра Пшемкова Єжы Щупака, якій поґратулювал новому директорови посады і пожелал успіхів. Данько Горощак был покликаный на трилітню каденцию.

Новый директор Пшемківского Осередка і Бібліотекы од років діє при лемківскых проєктах. Данько Горощак од молодых років был заанґажуваный в діяльніст Лемківского Ансамблю Пісні і Танця «Ластівочка», якій діє при пшемківскым Кружку Стоваришыня Лемків. Дотепер продолжат спілпрацу з колективом, неєднократно як конферансиєр ріжного рода подій, в тым подій орґанізуваных Стоваришыньом Лемків в Пшемкові – як прим. «Стрічы Трьох Поколінь з Лемківском Культуром». З ЛАПіТ «Ластівочка» неєднократно выступує як солиста – выконавця лемківскых пісен. Єст редактором «Радіо Лемко», творит ріжны авдициі.

Данько Горощак передом робил в другых інституциях культуры – Шпротавскым Культурным Домі, Центрi Культуры в Польковицях, а тіж спілпрацувал з Центром Творчых Діянь в Любіні, де в посліднім часі спілреализувал цикль подій – «Лемкы в Центрі».

На посаді директора заступил Боґумілу Орнатовску-Ціхошевску, яка завідувала ПОКіБ од 2006 р. Буромайстер попращал уступуючу ведучу і Ельжбєту Каспшак вчас сесиі 30. марця 2026 р.