Зачала продаж білетів на Миківскій Фестіваль

Од парох уж дни тоты, котры мают інтерес про тогорічний, XXVII Миківскій Фестіваль Русиньской Культуры, годны придбати білеты. Фестіваль пройде в днях 28.-29. липця/юлия в русиньскым селі Микова, з котрого походили родиче Енді Варголя. Самособом, подія каждий рік є присвячена як раз корольови поп-арту.

Вступне в передпродажы можете придбати в інтернеті, хоснуючы пошырений на Словациі порталь ticketportal.sk. Ціна поєдного білету то 8 евро. Окрем того, орґанізаторы заявили днес на Фейсбуку про даючий можніст выграня вступного конкурс, якій тырвал буде до 28. мая. Треба лем пошерувати афішом тогорічной едициі подіі та скоментувати пост, же сте гевсе зробили (деталі за мотузком). Конкурс лем про хоснувателів Фейсбука.

XXVII Миківскій Фестіваль Русиньской Культуры то два дни богаты в народну музыку, в модерну русиньску музыку та популярну словацку. В суботу, першого дня фестівалю, зо свойом Emotion Group выступит оперовий співак Ігор Куцер, якій своім голосом переспівує м.ін. русиньскы співанкы Юлиі Варголовой. На сцені не бракне і дам русиньской народной співанкы – Мариі Мачошковой та Анны Порачовой.

В суботу почуєме і мужску леґенду русиньскых пісен, автора доднес популярных Ци тебе Ганічнко, Буде война, буде, Побануєш мила, Помож мі Божічку, Понад воду лавка і ін., Штефана Василенко і його камаратів. Не бракне і солисткы молодой ґенерациі Мариі Железной. Тот ден выступлят тіж дітяча фольклорна ґрупа Маковичка, родинне Тріо Маґуровых, Свидницкы Геліґонкарі, ґрупа Еґо та наконец DJ Pepo.

В неділю запрезентуют ся такы гудакы з Народной Музыкы Стана Балажа, ґрупа Геленіны очы, Баста Фідлі ци Андер з Кошыц. Тот ден заспіват і загулят русиньскій фольклорний ансамбль Хемльон, співочы колективы Босорочкы, Гуменьскы Гачуре та Калина. В проґрамі передвиджены сут і дальшы атракциі і забавы.

Модераторами фестівалю будут знаны презентеры Михал Ільканин ай Штефан Скручаний.