Замениці кличут на Лемківскій Кєрмеш

Уж в найблизшу суботу, 5. липця/юлия в Заменицях на Нижнім Шлеску одбуде ся Лемківскій Кєрмеш, подія орґанізувана місцевом грекокатолицком парохійом св. Йоана Крестителя.

Хоц тогорічне престольне свято заменицка парохія уж одсвяткувала 24. червця/юнія (за тзв. новым календарным стильом), то Лемківскій Кєрмеш одбуде ся дальшый раз в часі близкым до праздника св. Йоана за юлияньскым рахуваньом, што того рока выходит в понедільок, 7. липця/юлия.

Традицийно заменицкы кєрмешы одбывали ся як єдна з товаришучых подій в рамках Медженародного Фольклорного Фестівалю Світ під Кычером. І тым разом буде дакус подібні – кєд же в проґрамі выступлят два колективы – участникы тырваючого як раз парарельно фестівалю. То ґрупы з Арґентины і Македоніі.

Кєрмеш зачне ся о 15.00 год. богослужыньом за мир на світі. Пак буде зложене квітя під памятником лемківскых жертв акциі «Вісла», якій был одкрытый в 2022 р., в 75. річницю выгнаня.

О 16.00 год. буде початок культурного проґраму – выступлят м.ін. ЛАПіТ Ластівочка з Пшемкова, Розтока з Рудной, Лемко Тавер зо Стшелец Краєньскых, ансамбль украіньской школы з Ліґниці, а тіж польскы колективы з сусідніх сел. Під вечер буде палена ватра. В вечерній части выступлят забавовы ґрупы – Троянда і Лемкус як «Кєрмеш Оркєстра».

Tоваришыти будут і другы акциі – як выстава лемківского облечыня і архівальных фотоґрафій. Буде мож тіж попрібувати лемківской кухні.