Запрошыня до Любiна до участи в святочній Лiтургii на Ден Копальника

Одкрытя руды мiди в любiньскым рейонi в марци 1957 рока спричынило, што вельох нашых Лемкiв, выселеных на Захiд в 1947 роцi, зачало дiяльніст в любiньскым мідьовым комбінаті на ріжных становисках. Од того моменту каждого рока 4. грудня/децембра є для вшыткых дньом особливым, вынятковым, припоминаючым о людях звязаных з копальництвом i iх трудах нелегкой роботы.

Як подає отец Богдан Репела, настоятель парохіі Св. Тройці з Любіна –
«Традицийнi, каждого рока 4. грудня/децембра стрічаме ся на святі копальника в любiньскiй церкви. Заносиме молитвы до Вашой Небесной Покровителькы Святой Варвары з подяком за цілорічну опiку над Вами. В лiтургiчным вымiрі того дня Церков обходит великє свято Введінiя в храм Пресвятой Богородиці, якє побiльшат святкуваня. Желаме най Пречыста Богородиця Дiва Мария покрыват Вас своiм небесным омофором, дарує Вам щестливы дни так в роботi, як i в родинi».

Каждого рока стрічаме ся в Любiнi по святочній Лiтургii в парафіяльній сальцi, штобы роздiлити тоту радiст, побесiдувати зо собом i поспоминати о подiях звязаных з гірництвом.

Прагну сердечнi подякувати вшыткым копальникам, котры до того часу хотiли подiлити ся своiм практичным знаньом з роботы на антенi радия ЛЕМ.фм, а сут нашыма парафіянами: Адамови Гербутови, Мариянови Шкуратови i третьому, якій оповіст в тым році свою історию 4. грудня/децембра – а хто він, того дознате ся, як послухате в радию ЛЕМ.фм о годині 15.30 проґрам ред. Мирка Боргача з Заходу під наголовком «Ден Копальників на Шлеску».

«Час, в якым мы ся нашли тепер в 2020 роцi, з увагы на пошырену в свiтi пандемiю, быти може в даякій мiрі ограничыт наше тогорічне торжествуваня, єднак Служба Божа за цiлый гiрничый стан одбуде ся в церкви Св. Тройцi в Любiнi 4. грудня/децембра о годинi 9.00.»

Як што рока, отец Богдан Репела желат вшыткым копальникам тильо выiздів, што зъiздів, а і представників вшыткых ресортів звязаных з гiрництвом на теренi Любiна i цiлого Нижнього Шлеска най Божа Матiр i покровителька Св. Варвара мают в свойой опiцi.