Засідал Собор ПАПЦ. Рішено о упамятнінях 100. річниці повороту Лемків до православя

10. марця під ведіньом митрополиты варшавского і цілой Польщы Савы засідал Собор Єпископів Польской Автокефальной Православной Церкви (ПАПЦ). В рамках засіданя владыкы рішыли так зовнішні, як і внутрішні темы повязаны з жытьом православной церкви.

Серед рішеных справ были і такы, якы тыкают православных Лемків, в тым поєдных лемківскых парохій.

Найважнійшом темом, яка тыкат не лем реліґійной обшыри Лемковины, але і історичной, было рішыня центральных упамятнінь 100. річниці повороту Лемків до православя. Собор подал, што молитовно-благодарны торжества одбудут ся в Ґорлицях, в неділю 6. вересня/септембра. То означат, што упмятніня будут в ден памяти св. священномученика Максима Ґорлицкого. З той нагоды встановлено тіж Ювілейный Медаль.

Рішыня єпископів значыт, што окрем центральных празднувань певністю в поєдных місцях будут проходити і місцевы. Такым селом в попередніх роках была хоц-бы Тылява, де в православній каплици (побудуваній на місци неістнуючой православной церкви) служыли ся благодарны богослужыня. В Тыляві же 16. листопада/новемвра 1926 р. прошло віче, де вырішено, што Тылява враз з дочырньом Терстяном повертают до православя.

Найбільше переходів поєдных сел на православя было в роках 1926-1928. Першы часовні побудувано в 1927 р. в Терстяні, Мшані, Дошници і Грабі. О рік вознесено уж церкви в Дошници, Святковій Великій і Вільшни. В 1929 р. побудувано святыні в дальшых селах, были то: Бортне, Боґуша, Чорне, Долгє, Гырова, Котан, Королева Руска, Незнайова, Свіржова Руска, Воловец. В 1930 р. вознесено часовні в Баници, Чырній, Ізбах, Яшковій, Камяній, Перунці і Снітници. В дальшых роках побудувано святыні в другых селах, прим. во Фльоринці, Білцаревій, Біличній, Полянах, Вышовадці ци Вафці. В тым часі, окрем часовні, в поєдных селах вознесено святыні, якы полнили фунцкиі церкви (часто в цікавых архітектонічных стилях) – в Тыляві, Перунці, Боґушы ци Волівци.

Окрем спомненых упямятнінь владыкы признали пасхальны нагороды для духовенства та вызначыли будучы загальномитрополитарны колекты, м.ін. на марец 2027 р. вызначена была колекта на ремонт церкви свв. Космы і Даміяна в Бліхнарці, а на квітен/апріль 2027 р. на реализацию розпису в церкви св. Владиміра в Креници. В маю 2027 р. будут зберати ся грошы на будову новой церкви в Кракові.