Засідала Рада єрархів. Рішыло ся партікуларне право в повязаню із праздниками а постом

В просторах Ґрекокатолицького архієпіскопства в Пряшові почас двох днів, в четверь 5-го і пятніцю 6-го фебруара 2026-го року, зышли ся єпіскопи на 41-ім засіданю Рады єрархів Ґрекокатолицькой митрополітной церькви sui iuris на Словакії.

Як інформовав Михал Павлишиновіч, говорця Пряшівской архієпархії, робочу часть засіданя вів Высокопреосвященый владыка Йона Максим, пряшівскый архієпіскоп і митрополіта – председа Рады єрархів.

Участны были і Высокопреосвященый архієпіскоп Кіріл Василь – кошыцькый єпарха, Преосвященый владыка Петро Руснак – братіславскый єпарха, і кір Мілан Лах – братіславскый помічный єпіскоп. Першый день засіданя быв участный і владыка Мілан Хаутур, кошыцькый емерітный єпарха.

Схвалили ся зміны в постній дісціпліні

На засіданю собі єпіскопи выслухали владыку Мілана Лаха, котрый як апостольскый візітатор ґрекокатоликів із Словакії у западній Европі інформовав о потребах і новых вызвах про пасторацію ґрекокатоликів із Словакії в загранічу.

Владыкове бісідовали і о потребі выдати мануал про душпатырьство священика із окремов увагов на новы і шпеціфічны сітуації в пасторації днешньой добы. Рада єрархів так само схвалила основаня трьох новых митрополітных комісій – душпастырьской, правницькой і про молодеж, жебы на уровни цілой митрополії занимали ся темами, котры суть общі про вшыткы єпархії.

Єпіскопи так само одголосовали приказаны праздникы і постну дісціпліну, котры бы мали актуалізовати ся, і по схваліню бы мали быти обовязковы про каждого ґрекокатолика, чім запер ся вопрос партікуларного права Ґрекокатолицькой церькви на Словакії, яке теперь може быти як комплетне загнане Апостольскому Престолу на дефінітівне схваліня.

Юбілеї блаженых

Із рихтованых актівностей у 2026-ім році бісідовало ся на засіданю Рады єрархів о митрополітній пути на Велеград (Чеська републіка) в місяці май того року із нагоды 80-ой річніці од першой пути Общества святых Кіріла і Мефтодія на тото місце під веджіньом блаженого священомученика – владыкы Павла Петра Ґойдіча, і 20-ой річніці другой пути під веджіньом владыкы Мілана Хаутура.

Высокопреосвященый владыка Йона пришов із думков одсвятковати і звекшыти почливость до блаженых Ґрекокатолицькой церькви в Юбілейнім році 2026 – 2027. В тім і слідуючім році припомянеме собі 50 років од смерти блаженого священомученика Василія Гопка, 25 років од беатіфікації владыкы Павла Петра Ґойдіча і єромонаха Мефтодія Домініка Тырчкы, 100 років од єпіскопской хіротонії владыкы Ґойдіча і 80 років од єпіскопской хіротонії владыкы Гопка.

Выникнутя Рады єрархів є повязане із митрополітным упорядкованьом Ґрекокатолицькой церькви на Словакії у 2008-ім році. Митрополітови у выконованю його властей помагать Рада єрархів, котра є законодавчім орґаном.