Засідала Світова Рада Русиньской Молодежы

В віторок 2. липця/юлия одбыло ся перше в меджеконґресовым періоді засіданя Світовой Рады Русиньской Молодежы, в складі выбраным на проходячым перед нецілым місяцьом в Букарешті XVIII Світовым Конґресі Русинів.

Засіданя Світовой Рады Русиньской Молодежы проходило в онляйновій формі. Участны были: Свєтлана Бойчук – представничка Румуніі, яка в Раді Молодежы засідат в функциі предсідателькы, Александер Гричко за Словацию, Яна Томкова за Чехы, Срдян Ґовля за Сербію і Іван Лікар за Хорвацию, якого єдноголосно принято до Форум в заступстві за Матея Бучарка.

Як раз Іван Лікар отворил засіданя і представил складаючый ся з шестьох пунктів плян зобраня. Першым было представліня і принятя справопису з ХІІ Світового Форум Русиньской Молодежы (СФРМ), котре проходило паралельно до XVIII Світового Конґресу Русинів. В рамках той части Іван Лікар принятый был за секретаря СФРМ.

В порядку был дале пункт про принятя пляну роботы Світового Форум Русиньской Молодежы на період 2025/2027. Рішено приняти спільный календар культурных подій, якы проходят в членьскых державах, жебы справнійше промувати подіі серед молодых Русинів, активнійше брати в них участ і навязувати новы контакты.

Для шыршой доступности діянь Світового Форум Русиньской Молодежы, члены Рады рішыли утворити профілі в соспільных медиях – в сітях Facebook i Instagram. Редактором обох остал Александер Гричко, дальшы члены зобовязали ся до пересыланя інформаций зо своіх держав до публиквуаня.

Члены Рады рішыли реґулярно – раз на два місяці, орґанізувати онляйновы стрічы Рады, окрем двох стацийонарных, якы мают быти в Румуніі і Хорвациі вєдно зо засіданьом Світовой Рады Русинів.

Серед найблизшых активности находят ся м.ін. справы звязаны зо зорґанізуваньом стрічы молодых Світового Форум Русиньской Молодежы в Новым Орахові в січни/януарі 2026 рока та выізд сербско-хорватской делеґациі на Ватру в Малым Липнику, яка зачынат ся днес.

Дальшым пляном єст сконтактуваня ся з членами Світотой Рады Русинів за Польщу, Украіну і Америку, жебы тоты зголосили своіх членів до Світовой Рады Русиньской Молодежы, в звязку з фактом, што делеґациі молодых з тых держав не были присутны на посліднім Світовым Конґресі Русинів в Букарешті і Світовым Форум Русиньской Молодежы.

Чергова стріча заплянувана єст на початок вересня/септембра, яка буде введіньом до стрічы нажыво в Старых Янковцях в Хорвациі кіньцом того самого місяця в рамках свята «Коли голубиця летіла».