Жеґєстів на старій фотоґрафіі

В четвер, 26. квітня/апріля 2018 р., в лемківскым Жеґєстові пройде дальша выстава фотоґрафій присвячена як раз тому селу та загально надпопрадскій долині по тій стороні Карпат.

На выставі вказаны будут стары фотоґрафіі представляючы красу того гірского здрою. Жеґєстів, находячий ся на граници Лемковины і Пряшівской Руси, долгы рокы был селом, котре лучыло Русинів з єдного і другого боку. Выстава запрезентує загальнійше близку надпопрадску долину, котра доднес являт ся єдным з найатракцийнійшых реґіонів одвиджаных через туристів з Польщы і Словациі.

Орґанізаторами подіі сут Публична Бібліотека Міста і Ґміны Мушына та Товариство Приятелів Жеґєстова. Заплянувана выстава є другом частю. Перша была в листопаді/новембрі 2017 р. і тіж односила ся до архівальных фотоґрафій села. Тоты самы орґанізаторы зимом 2018 р. зрыхтували выставу прац Павла Дуляка, місцевого фотоґрафіка, котрий наштоден знимат днешню красу Жеґєстова і околиц.

До кінця ІІ світовой войны Русины в тым селі были більшістю. В рамках выселінь до Росиі, а пак в рамках цілковитого вынищыня вчас акциі Вісла село стало порожнім од автохтонів. Місцевіст зачала быти знаным курортом уж в меджевоєнным періоді. Попри Креници была часто одвиджана туристами. В селі мож лікувати ся м.ін. на ревматолоґічны хвороты ци хвороты почок. Доднес є найменшым здройом в Польщы. Речена выстава буде предовшыткым презентувала часы розвитку здрою та інтересуючу архітектуру поєдных здройовых домів і пенсийонатів.

Вернісаж выставы о 17.00 год. в одділіню Публичной Бібліотекы Міста і Ґміны Мушыны в Жеґєстові.