Згоріту русиньску деревяну церьков в Празі ани по веце як році і пів не зачали реконштруовати

В пражскій Загороді Кіньскых в октобрі 2020-го року згоріла деревяна Церьков святого Михаіла Архістратига, котра была із 17-го столітя і походила з Підкарпатьской Руси. Церьков перенесли до Прагы в році 1929. Участный святочной церемонії перенесіня быв і ґубернатор Підкарпатьской Руси Антоній Бескид.

Такой по тім, што церьков ыгоріла, было зорґанізоване і збераня грошей, жебы храм штонайскоріше зреконштруовав ся.

Як інфомовав портал iRozhlas.cz, ани по веце як року і пів од нещастя церьков не зачала ся реконштруовати. Реконштрукція бы притім подля дакотрых робітників памяткового уряду могла проходити скоріше.

Храм прикрыли

Церьков святого Михаіла Архістратига є моментално закрыта ставебнов конштрукційов і білов плахтов, котра торзо памяткы хранить перед кліматічныма впливами і доджом. Но озывають ся голосы, же є найвысшый час, жебы зачати з реконштрукційов.

„Охрана є потрібна, але лем дочасна. Будова є з дерева. Жебы єй не хопила якась плесень або гнилоба, буде треба з оправами іти допереду, жебы памятка пережыла,“ повів Якуб Бахтік з Клубу за старов Прагов і історік архітектуры.

Клуб за старов Прагов публіковав і выголошіня, в котрім выражать своє знепокоїня з помалым процесом обновліня храму, і факт, же реконштрукція іщі не зачала, бере за куріозный.

Оправу церькви має забезпечіти Пражскый маґістрат. Подля говорцю маґістрату Віта Гофмана на початку марца скінчів конкурз на ставебно-історічне баданя, по выголошіню выслідків мав маґістрат зачати з далшыма процесами і зреалізовати споминане баданя.

Церьков є унікатом

Гофман думать, же ку кінцю того року бы ся мало пожадати о ставебне позволіня, і так само бы мали быти готовы вшыткы проєкты ку тому потрібны. Ставба бы за його словами могла зачати на ярь 2023-го року. Мінімално далшый рік бы мали проходити роботы на реконштрукції.

По Чехів є русиньска церьков унікатна. „Свойов історійов і тым, же такых будов у нашій републіці не маєме, є унікатом. Хоць є лем перенесена з іншого кінця Европы,“ припомянув директор пражского одділіня Народного памяткового інштітуту Ярослав Подліска.

Храм хтось підпалив

Кедь церьков у 2020-ім році выгоріла, гасічі не припустили технічну причіну пожару. Подля них деревяну церьков хтось задумано підпалив. Но поліція дотеперь виноватого не нашла і припад одложыла. Наперек тому буде мож велику часть храму оправити.

„Розумію тому, же люди думають, же деревяна конштрукція майже згоріла. Но по детайлнішім баданю і аналізі знаєме, же была засягнута северна часть будовы і турні. І стріха має проблему. Но основна конштукція є дубова, суть то три зрубы споєны до єдной части. І тоты, повів бы-м, з пядесятьох процент зістали автентічны, непорушены, обновительны,“ повів Подліска.

Голова пражскых памяткарів одгадує добу, за котру зробить ся комплетна реконштрукція, на дакілько років. Порівнює то з подобныма припадами в Празі, кедь од пожару до закінчіня реконштукції перешло і пять років.

Кілько грошей буде треба на комплетну рекошнтрукцію, затля не знать ся. Но люди на транспаретный рахунок, котрый зробив маґістрат на тот ціль, загнали коло двох міліонів чеськых корун.

Жрідло фотоґрафії: iRozhlas.cz.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА