«Жыли попри собі – Полякы і Лемкы» – проєкт учеників ґорлицкой школы

Жыли попри собі – Полякы і Лемкы – то нова ініциятива учеників ґорлицкого Комплексу Економічных Шкіл ім. Йоана Павла ІІ, котрой результатом єст ок. сорокминутовий фільм, зреалізуваний в рамках проєкту «Оповім Ти о Свобідній Польщы»/«Opowiem Ci o Wolnej Polsce», орґанізуваного Центром Громадяньской Едукациі в Варшаві. Як бесідує єдна зо спілавторок фільму, Юлия Дуць –  […] так направду з ініциятивом вышла наша учытелька істориі, п. Павлина Квятек. Спочатку проєкт мал быти о жытю Лемків, Поляків і Жыдів, але коли зачали сме ся заглубляти в документы, рішыли сме, же радше получыме лемківско-польскы реляциі, прото же маме дуже інформаций на тоту тему, но і окрем того каждий з нас (осіб котры сут в проєкті) має дашто спільне з Лемками. 

Окрем Юлиі Дуць, спілавторами фільму сут тіж Катерина Глива та Аркадий Тарса. Інтервю были проводжены з близкыма авторам особами, чого же плодом єст фільм Жыли попри собі – Полякы і Лемкы. Участникы проєкту надіют ся достати до дальшых етапів в Варшаві.

В фільмі выступили Аґата Колодійчык, Михал Колодійчык та Олена Дуць. Чути тіж музыку Гудаків, Квадро Сусанны, Сусанны Ярой-Малецкой та Дуляровых Братів. Находят ся гын тіж фотоґрафіі авторства Ярослава Мазура та архівальны знимкы з родинных альбомів.

Позерайте долов на фільм Жыли попри собі – Полякы і Лемкы. Желаме доброго обзераня!

Фот. скрін з фільму.