Зонація Полонин має важны недостаткы

Пропозіція зонації Народного парку Полонины має веце важных недостатків. Дакотры із них ледво суть злучітельны із ефектівнов охранов природы. На соціалній сіті о тім інформовав Комітет Енвіроменталной секції Природознавчой факулты Універзіты Коменьского в Братіславі, пише аґентура TASR.

Комітет є пересвідченый, же претензії і штандарды охраны Полонин бы мали быти наставлены значно высше.

Пропонують матеріал переробити

„Лем высоко фаховый приступ, інтензівна діскусія із хоснователями і маїтелями фундушів, але єднако і реалізація шырокого спектра законом даных можливостей компензації за обмеджіня хоснованя фундушів, докажуть забезпечіти справды оптімалный і ефектівный модел зонації Народного парку Полонины,“ сконштатовала факулта, котра запропоновала свій фаховый потенціал і охоту глядати рішіня.

Комітет пропонує значне переробліня пропозіції зонації. Рекомендує, жебы пропозіція в максімалній можливій мірі приближыла ся крітеріям Меджінародной унії про охрану природы і природных жрідел.

До увагы бы Міністерство жывотного оточіня Словацькой републікы мало брати подля споминаного становиска і охрану буферной зону A2 локаліты світовой природной дідовизны UNESCO Стары буковы лісы, і на основі фаховых крітерій бы мали быти записаны до зоны A або зоны B. Має ся то подля Природознавчой факулты зробити так, жебы зонація забезпечіла потребне еколоґічне капчаня, інтеґріту і охрану компонентів UNESCO.

Далше факулта рекомендує, жебы были стары лісы, котры суть записаны в передкладаній пропозіції до зоны C із третім ступньом охраны, переписаны до зоны A із найвысшым ступньом охраны в змыслі Плану обновы. Подля фаховців сучасна пропозіція зонації не забезпечує достаточну охрану старых лісів, ключовых про тото, жебы пережыли цінны і все рідкішы виды і біотопы.

Коло Старины бы ся не мав знижыти ступень охраны

В поводю водного резервоару Старина бы подля Комітету Енвіроменталной секції Природознавчой факултры Універзіты Коменьского не мав знижыти ся ступень охраны. На парцелах із пропонованым знижіньом ступня охраны бы мав зохабити ся теперішній стан, і то третій ступень охраны.

„Так мож забезпечіти адекватну охрану нелем стратеґічного жрідла питной воды, але єдночасно і цінных ключовых видів як зубор.“

Фаховці припомянули, же зонація народных парків є кроком про практічну охрану природы із впливом на захованя еколоґічных сістем, включно їх цінных і огроженых файт і біотопів. „Правилно надізайнована зонація із транспарентныма і ясныма правилами діліня зон в згоді із актуалныма правныма нормами, і на основі модерных науковых знань, є потребным условієм успішного повніня встановленых цілів,“ додала факулта.