Папа Франціск оцінив одвагу русиньской єпархії

Папа римскый Франціск в середу 11-го децембра 2019-го року оцінив одвагу русиньской Мукачівской ґрекокатолицькой єпархії, котра перед тридцятьома роками вышла з ілеґаліты по роках пронаслідованя.

Вірны єпархії, означены в статі як русиньскы католикы, котры путовали до Ватікану, стрітили ся з Папом в Базиліці св. Петра із нагоды той округлой річніці. Інформовав о тім портал Catholic News Agency.

Господь освободив вашу Церьков

„Я радый, же вас можу привітати на гробі святого Петра і вєдно з вами хочу подяковати безконечно доброму Господу, котрый свойов міцнов руков освободив вашу Церьков спід довгого утискованя совітьскым режімом,“ повів на стрічі Папа.

Голова Католицькой церькви так само споминав на предків, дідів і бабы, отців і матере, котры в пріватности своїх обысть і часто під доглядом неприятельского режіму, ріскуючі свою свободу і жывот, передавали науку правды о Хрістови будучім ґенераціям, „котры представлюєте як досправдовый свідок певной віры, жывой віры, католицькой віры.“

Матірь мучеників

Почас десятьліть совітьского утискованя было умученых 36 священиків Мукачівской ґрекокатолицькой єпархії. Папа Франціск подяковав підземній церькви за вірность Хрістови почас пронаслідованя і мученицьтва і повів, же „Мукачівска церьков є матірьов многых мучеників, котры свойов властнов кровльов потвердили свою вірность Хрістови, Католицькій церькви і Римскому єпіскопови.

Припомямнув і блаженого єромученика, єпіскопа мукачівского Теодора Ромжу, котрый „в найтемнішых хвілях вашой історії доказав вести Божый народ євангелійовов мудростьов і одвагов.“

Папа повів, же при святочній принагоді ся молить ку Господу, жебы охорновив Мукачівску єпархію перед покушінями злого і дав їй повный розвиток.

„Кедьже ся ближыме ку Рождественным святам, давам вашых пастырів і вшыткых вас, милы віруючі, під покров Мукачівской Пречістой Богородіці і жычу вам Святе Рождество: най у вашых сердцях народить ся Божый Сын,“ закінчів Папа.

Жрідло фотоґрафії: Vatican News.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА