Польща выбрала. Першы сондажовы результаты Exit poll при фреквенциі 61,1%

В неділю, 13. жолтня/октобра 2019 р., в Польскій Республиці проходили парляментарны выборы. Подля першых сондажовых результатів аґенциі ІПСОС, якы явили ся такой по закрытю выборчой тишы, найвеце голосів отримала урядуюча од остатньой каденциі партия Право і Справедливіст.

Громадяне Польщы могли голосувати такой через цілу неділю. Выборчы локалі были одкрыты од 7.00 до 21.00 год. (дакус інакше за границями в консулярных єдиницях). По тій годині явили ся першы результаты загальнопольского сондажу Exit poll. Подля нього урядуюча зъєднана правиця – партия Право і Справедливіст (Prawo i Sprawiedliwość) отримало 43,6% голосів.

Другій результат мат комітет Гражданьска Коаліция (Koalicja Obywatelska) – 27,4 %. Третє місце занимат комітет Лівиці (Lewica), котрый отримал 11,9 % голосів. На четвертым місци нашол ся комітет Польского Народного Сторонництва (Polskie Stronnictwo Ludowe), якій стартувал вєдно з партийом Кукіз’ 15 (Kukiz’ 15). Отримал він чысло 9,6 % голосів. Посліднім комітетом, котрый найправдоподібнійше найде ся в польскым парляменті буде Конфедерация (Konfederacja), якій за сондажом мат 6,4%. Вшытко тото при рекордовій фреквенциі, яка за сондажовыма результатами скочыла до 61,1%.

Попри процентовым результатах найосновнійшый єст розклад голосів в соймі. Тоты вказуют, што урядуюча од штырьох років партия Право і Справедливіст дальшу каденцию в 2019-2023 рр. буде рядила сама, маючы 239 посольскых мандатів. Польскій сойм чыслит 460 послів. Дальшы партиі отримают по черзі 130, 43, 34, 13 місц в Соймі. Єдно місце припаде стартуючому в выборах представникови німецкой меншыны, котрой (як і потенцияльно інчы меншыны) за записами Уставы про нацийональны і етнічны меншыны та реґіональный язык не обовязує выборче мінімум узыскати 5% голосів в цілій державі.

Дакус інакше можу выглядати результаты голосуваня до высшой ізбы польского парляменту – Сенату. Тым більше, што не вшыткы загальнопольскы комітеты выставили своіх кандидатів. Были і такы комітеты, котры лем локальні стартували в выборах до сенату. Прикладом може быти комітет Безпартийных Самоурядовців (Bezpartyjni Samorządowcy) на Нижнім Шлеску. Чысло охочых здобити дакотре зо 100 місц в Сенаті было о вельо низше як в листах до Сойму. На єдно місце кандидували нецілы три особы. До Сойму – близко єденедацет.

За сондажом Exit poll подаваных за ІПСОС, Право і Справедливіст перемогло в штырнадцетьох з шістнадцетьох воєвідств. Конечны результаты выборів до польского парляменту будут знаны найпевнійше в понедільок пополудни, або аж в віторок рано. Сондаж exit poll принимат статистичный блуд в границях до 2%. По офіцияльных результатах, оголошеных Державном Выборчом Комісийом, пережожці найпевнійше приступлят до творіня нового уряду влады.