Дариян Гарди серед найліпшых в рамках Graduation Projects 2020

Дипломова робота Дарияна Гарди з Руского Керестура, недавного абсольвента Працовні Ілюстрациі і Ґрафікы Высшой Школы Артистичного Ремесла в Празі (UMPRUM), нашла ся серед найліпшых презентуваных в рамках Graduation Projects 2020.

Graduation Projects не мат характеру конкурсу, є радше переглядом найліпшых дипломовых робіт з обшыри взірництва надосланых до оціны през дипломантів проєктовых напрямів з Чех, Польщы, Словациі і Мадяр. Конкурсова комісия не рішат порядку місц, не признає нагорід. Выберат найліпшы проєкты зо вшыткых надосланых, а самым выріжніньом є найти ся в каталоґу перегляду, на його інтернетовым сайті. Проєкт презентувный є тіж на експозициях в Польщы і заграницьом.

Диплом Дарияна Гарди нашол ся як раз серед тых найліпшых проєктів, спосеред 240 надосланых, і презентуваный є в рамках Медженародного Перегляду Дипломовых Проєктів Graduation Projects 2020. Дариян Гарди в рамках маґістерской роботы запроєктувал «Словник Хазарів».

Хазарска постмодерна

В заміріню проєктанта было найти нову візуальну, посмодерністичну форму для дебютантской повісти Милорада Павича, сербского писменника, «Хазарскій словник: Повіст-лексикон на сто тисячів слів» з 1984 рока. Книжка веде чытальника через світ трьох реліґій – християнства, ісляму та юдаізму – та іх версиі возникніня і падіня Королівства Хазарів. Як мож чытати в поясніню комісиі выбору того же проєкту до ґрупы найліпшых: «Нова візуальна форма была інспірувана символами, метафорами і народныма істориями, котры автор проєкту схоснувал до реконструкциі і креациі хазарского світа. Чытальник принимат активну ролю, подібну до той, яку має вчас лектуры експериментального тексту повісти. Aвтор диплому модифікує і зліпшат світ знаный зо словника, лучыт, подібні як Милорад Павич, фікцию з реальністю. Зато тіж проєкт был пошыреный о новый розділ, в котрым находят ся знимкы документуючы хазарскы сліды на териториі Сербіі».

Комісия оцінювала роботы в двох катеґориях – ґрафічный дізайн і промыслове взірництво. Головным орґанізатором перегляду є Замок Цєшын, своє підпертя дают тіж: Hungarian Design Council, CZECHDESIGN та Slovak Design Center. Вшыткы выріжнены проєкты в рамках Медженародного Перегляду Дипломовых Проєктів Graduation Projects з едициі за 2020 рік мож видіти за тым мотузком.

Дариян Гарди

Дариян Гарди походит з Руского Керестура в Сербіі. Єст абсольвентом Высшой Школы Артистичного Ремесла в Празі. Окрем того вчыл ся на Академіі Красных Штук в Ґданьску, в Братиславі та в середній Школі про Дізайн Боґдан Шупут в Новым Саді. На своім конті має індивідуальны і колективны выставы м.ін. в Рускым Керестурі, Новым Саді ци Братиславі. Жыє в Празі.

Фот. горі за ruskeslovo.com

Повязаны дописы

Русиньскы експонаты будуть мати діґіталны копії. Діґіталізує ся і на Підкарпатю

Осінні подіі Стоваришыня Лемків: Лемківска Творча Осін і Стрічы Трьох Поколінь

Łemkowie są…

Спомож нас / Wesprzyj nas